აგვისტოს ბოლოდან შესაძლოა, შემთხვევების რაოდენობა გაგვეზარდოს - თუ შემოდგომამდე დასახულ მიზნებს გარკვეულწილად მივუახლოვდებით, გვექნება იმედი, რომ შემოდგომაზე „მეოთხე ტალღა“ ქვეყნისთვის ძალიან მძიმე არ იქნება“, - ამის შესახებ ალერგოლოგ-იმუნოლოგმა ბიძინა კულუმბეგოვმა ჟურნალისტებთან ეპიდვითარებაზე საუბრისას განაცხადა.

როგოც კულუმბეგოვი დასძენს, ქვეყანაში იმუნიზაციის პროცესი უნდა გაიზარდოს, არსებული ვაქცინაციის ტრაექტორიით დასახული მიზნებისგან შორს ვართ.

“უნდა ვიცოდეთ, რომ ჩვენი ტრაექტორიით, რომლითაც ჩვენ მივდივართ, ვაქცინაციის მოცვის დონით და ხარისხით, პაციენტების ავადობით და პირბადის ტარების მაჩვენებლით, ქვეყანაში ყველა პროგნოზირებადი ინსტიტუტი გვეუბნება, რომ აგვისტოს ბოლოდან შესაძლოა, შემთხვევების რაოდენობა გაგვეზარდოს.

130 ათასი ადამიანის ვაქცინა ჩვენი ქვეყნისთვის ძალიან ცოტაა, ეს უნდა გაიზარდოს, შესაბამისად, თუ შემოდგომამდე დასახულ მიზნებს გარკვეულწილად მივუახლოვდებით, მაშინ გვექნება იმედი, რომ შემოდგომის „მეოთხე ტალღა“ არ იქნება ჩვენი ქვეყნისთვის ძალიან მძიმე. სხვა გამოსავალი არ არსებობს. ამ ვაქცინაციის ტრაექტორიით, დასახული მიზნებიდან შორს ვართ. იმედს ვიტოვებ, ზაფხულის მეორე ნახევარში და შემოდგომაზე, ქვეყანაში დღეში მინიმუმ 10-15 ათასამდე ვაქცინა დოზა უნდა გაკეთდეს“, - აღნიშნავს კულუმბეგოვი.

მისივე თქმით, კორონავირუსის საზოგადოებრივი გავრცელების პრევენციისთვის აუცილებელია მოსახლეობის 70-80 პროცენტი იყოს აცრილი.

„რა თქმა უნდა, სახელმწიფო ყველა შესაძლო სცენარისთვის უნდა ემზადებოდეს. „მეოთხე ტალღის“ დამაზიანებელი ეფექტი, რომ შეგვიმცირდეს, უნდა ვიცოდეთ, რომ მოსახლეობის თითქმის 25%-ს გადატანილი აქვს კორონავირუსი, ეს გარკვეულწილად დაცვაა, მაგრამ, ინფექციის შიდა საზოგადოებრივი გავრცელების პრევენციისთვის აუცილებელია მოსახლეობის დაახლოებით 70-80 პროცენტი იყოს აცრილი“, - აღნიშნავს კულუმბეგოვი.

IPN.GE