„თავისუფლების მოედანთან, კერძოდ კი ყოფილი ცეკავშირის შენობის ადგილზე, მარიოტის უმაღლესი კლასის ბრენდის „Luxury Collection “, სასტუმროს მშენებლობა დასკვნით ეტაპზეა“, - ამის შესახებ „კომერსანტს“ ბიძინა ივანიშვილის თანაინვესტირების ფონდში განუცხადეს. მათი ინფორმაციით სასტუმროს მშენებლობა 2021 წელს დასრულდება. თავდაპირველად ცნობილი იყო, რომ სასტუმრო 2020 წლის შემოდგომაზე უნდა გახსნილიყო, თუმცა ქვეყანაში შექმნილი ვითარების გამო სასტუმროს გახსნა ერთი წლით გადავადდა.

„დღეის მდგომარეობით, მშენებლობა აქტიურ ფაზაშია, დასრულებულია სამშენებლო სამუშაოების ძირითადი ნაწილი და მიმდინარეობს შიდა მოპირკეთების სამუშაოები. სასტუმრო თავისუფლების მოედანთან, საბაგირო გზით დაუკავშირდება სასტუმრო სოლოლაკს, რომელიც შემდგომ უკვე დაუკავშირდება თაბორის სასტუმროსა და გოლფ კლუბს. სასტუმროში იფუნქციონირებს ექვსი კატეგორიის 220 ნომერი, საკონფერენციო, შეხვედრების ოთახები, A კლასის საოფისე და კომერციული ფართები, სპა, ფიტნეს ცენტრი და საცურაო აუზი, რომელსაც თბილისის შესანიშნავი ხედები დაამშვენებს“, - განმარტავენ თანაინვესტირების ფონდში.

რაც შეეხება სოლოლაკის მაღლობზე მდებარე  სასტუმროს და საკონფერენციო ცენტრს, რომლის ინვესტიციის ოდენობა 115 მლნ აშშ დოლარს შეადგენს, 2023 წელს დასრულდება. ხოლო ერეკლე II-ს მოედანზე 30 ნომრიანი, ბუტიკ სასტუმროს მშენებლობა 2022 წელს. პროექტის ინვესტიციის ჯამური მოცულობა 10 მლნ აშშ დოლარს შეადგენს.

ასევე  აქტიურად მიმდინარეობსი მასშტაბური სამუშაოები თაბორის ქედზე, 402 009 კვ.მ რეკრეაციული ზონის მოსაწყობად, სადაც მთლიანი ტერიტორიის 95% იქნება სრულად გამწვანებული. როგორც „კომერსანტს“ თანაინვესტირების ფონდში განუცხადეს. რეკრეაციული სივრცე გააერთიანებს, ლანდშაფტთან შერწყმულ 9 ფოსოიან გოლფის მოედანს, ხელოვნური ტბას და სპორტულ მოედნებს. ამასთანავე პროექტის ფარგლებში მიმდინარეობს 176 ნომრიანი სასტუმროს მშენებლობა, სადაც განთავსდება საცურაო აუზი, სპა ცენტრი, სავარჯიშო დარბაზი, რესტორანი, ბარი და ა.შ.  პროექტის ჯამური საინვესტიციო ღირებულება 90 მლნ აშშ დოლარს შეადგენს, ხოლო მისი მშენებლობა 2022 წლის I-ელ კვარტალში დასრულდება.

ბაჩო ადამია