„კომერსანტის“ ინფორმაცია დადასტურდა, ფონდი „ქართუს“ დაფინანსებით, თბილისის მერიასთან თანამშრომლობის ფარგლებში, მთაწმინდის ფერდობებზე არსებული დაზიანებული ნარგაობების აღდგენის სამუშაოები იწყება.პროექტი, რომლის პრეზენტაციაც დედაქალაქის მერმა, კახა კალაძემ ფონდი „ქართუს“ სამეთვალყურეო საბჭოს თავმჯდომარე ნიკოლოზ ჩხეტიანთან და სოფლის მეურნეობის მინისტრ ლევან დავითაშვილთან ერთად გამართა, მთაწმინდის ფერდის ტყის ლანდშაფტის აღდგენა-რეაბილიტაციასა და ტურისტულად მიმზიდველი გარემოს შექმნას ითვალისწინებს. საუბარია დაახლოებით 700 ჰექტარი ტერიტორიის გამწვანებაზე.

პროექტის განხორციელების მთავარი მიზანი არსებული ფერდის ლანდშაფტის ოთხ სეზონად გადაქცევაა, რაც მარადმწვანე და ფოთლოვანი ხეების, ასევე, ბუჩქოვანი და ბალახოვანი საფარის განაშენიანება-რეაბილიტაციას გულისხმობს.

როგორც კალაძემ განაცხადა, სამუშაოების შედეგად, თბილისის ურბანული ტყე-პარკის სივრცით-ფუნქციური და ტექნიკურ-ეკონომიკური განვითარების ხედვის შემუშავება, ასევე, საჯარო განხილვებისა და შესაბამისი მუნიციპალური შეთანხმებების შემთხვევაში, მომდევნო ეტაპების განხორციელება იგეგმება. კერძოდ, საპროექტო, სამშენებლო, საზედამხედველო, საექსპლუატაციო, მართვის კომპონენტების დეტალური დაგეგმარება და დაპროექტებული სამუშაოების შესრულება.

პროექტის ამჟამინდელ ეტაპზე, ფონური საკადასტრო კვლევები და ურბანული ტყის საზღვრების განსაზღვრა-დაზუსტება, ასევე, ერთიანი ინტეგრირებული სივრცითი ეკონომიკური და ტურისტულ-სარეკრეაციო ინფრასტრუქტურის განვითარების ხედვის დამუშავება მიმდინარეობს.

პროექტი თბილისის მუნიციპალიტეტის მერიას, გარემოს დაცვისა და სოფლის მეურნეობის სამინისტროს, ფონდ „ქართუსა“ და ფონდ „განვითარება და გარემოს“ შორის დღეს გაფორმებული ურთიერთგაგების მემორანდუმის ფარგლებში განხორციელდება. მემორანდუმი მუნიციპალიტეტის საზღვრებში მოქცეული დეგრადირებული ტყეების აღდგენისა და რეკრეაციული ინფრასტრუქტურის განვითარების სფეროში თანამშრომლობას ითვალისწინებს. შეთანხმების თანახმად, ფონდი „ქართუ“ მომდევნო ოთხი წლის განმავლობაში, დეგრადირებული ტყეებისა და ფართობების აღდგენის, ასევე, რეკრეაციული ინფრასტრუქტურის განვითარების პროექტს 16 მილიონი ლარის ფარგლებში დააფინანსებს.

შეგახსენებთ, „კომერსანტი“  2019 წლის ნოემბერში ბიძინა ივანიშვილის მეგობარ, ფონდ „განვითარება და გარემოს “ თავმჯდომარე და პროექტის ხელმძღვანელ თემურ ტყემალაძეზე დაყრდნობით წერდა,  რომ უნდა მოხდეს იმ მცენარეული საფარის აღდგენა, რომელიც წლების წინ იყო მთაწმინდის ფერდობზე გაშენებული და რომელიც შეესაბამება ადგილობრივ ჰავას, კლიმატს და ნიადაგს. მისი თქმით, ახლა იმ გუნდის შეკრებაზე მუშაობს, რომელიც უახლოეს მომავალში პროექტის მომზადებას დაიწყებს.

„მთაწმინდის ფერდის გამწვანების პროექტი არის ჩემთვის ძალიან მნიშნელოვანი და საინტერესო. პროექტის შესახებ გავაჟღერე ბატონ ბიძინასთან, მისი ხედვები ჩემ ხედვებს დაემთხვა და გადაწყვეტილება მყისიერად იქნა მიღებული. წინა საპროექტო მოკვლევები დავიწყეთ, რადგან ეს ადგილი არის ქალაქის გული და გამორიცხულია იქ რაიმე შეუთავსებლობა მოხდეს. ეს ტერიტორია ერთ-ერთი თვალსაჩინო ადგილი უნდა გახდეს ყველა მნახველისთვის. პლუს ეს ადგილი უნდა იყოს მდგრადი, რათა ადამიანს შეეძლოს იქ დასვენება და ბუნებასთან სიახლოვე, ამ ყველაფრის შეთავსება კი მარტივი არ არის. სამწუხაროდ, ჩვენ ჯერ არ გვყავს იმ დონის სპეციალისტები, რომ ეს ყველაფერი გაითვალისწინონ, ამიტომ დავიწყეთ საზღვარგარეთ უცხოელი სპეციალისტების ძებნა. პროექტის მომზადებაში უამრავი სპეციალისტი ჩაერთვება, დაწყებული ეკოლოგიით დამთავრებული ლანდშაფტის დიზაინერით. ეს არ იქნება ჩემი პროექტი, ეს იქნება პროფესიონალი ხალხის პროექტი, ჩემი არის იდეა თუ რა უნდა გაკეთდეს. ეს ერთი დღისთვის არ კეთდება, პროექტი წლების განმავლობაში უნდა დარჩეს. აღსანიშნავია ის, რომ ჩვენ არ ვეხებით იმ ტყის საფარს, რომელიც ცოცხალი და ჯანსაღია“ - აცხადებდა მაშინ თემურ ტყემალაძე

მისივე ინფორმაციით, მინდვრისა და მთის ნეკერჩხლები, კავკასიური ფიჭვი, საკმლის ხე, მუხა, აკაკი და იფანი– ეს იმ მცენარეების ჩამონათვალია, რომლითაც ბიძინა ივანიშვილი მთაწმინდის ფერდობზე გამხმარ და დაავადებულ მცენარეთა ჩანაცვლებას გეგმავს. პროექტის სავარაუდო ღირებულება 12-15 მილიონი ლარი იქნება.