პარლამენტის დარგობრივ სხდომაზე ფინანსთა მინისტრი არ მივიდა. ფრაქცია „დამოუკიდებელი დეპუტატების“ წევრმა ლევან კობერიძემ გადაცემაში „პოლიტიკის ფორმულა“ განაცხადა,რომ ფინანსთა მინისტრმა ისინი მოატყუა.
„ჩვენ გავაგზავნეთ ფინანსთა და ჯანდაცვის მინისტრებთან წერილი,რომ მობრძანებულიყვნენ ფრაქციაში და კონკრეტულ საკითხებზე გვესაუბრა. ეს საკითხებია დღგ-ს ნაწილში ყალბი აქტივის შექმნა, ტელევიზიების მიერ არგადახდილი დღგ და აზარტული თამაშები. კითხვები გვქონდა გაყალბებულ აქტივებზე,რომელთა რიცხვმაც 200 მილიონს გადააჭარბა. ვიღაცამ პრიდაპირ აიღო ჩვენი ფული და მოიპარა,ჩვენ კი ვიბარებდით მინისტრს იმისთვის,რომ გვესაუბრა, იქნებ,ისიც ჩართულია ამ ყველაფრის წინააღმდეგ ბრძოლაში და ჩვენი მხარში დგომა სჭირდება. ასეთი დიდი ფინანსური მაქინაცია, ბოლო 25 წელია ქვეყანაში არ განხორციელებულა,“- ამბობს კობერიძე.
მისი თქმით, ბიუჯეტიდან თანხა ჯერ მოიპარეს, შემდეგ კი კერძო კომპანიებზე გადანაწილდა. ის არამარტო ფინანსთა მინისტრის, არამედ შემოსავლების სამსახურის უფროსის პასუხისმგებლობის საკითხსაც სვამს.
„ვინ არიან ის ადამიანები,რომლებმაც 100 მილიონთან დაკავშირებით მიიღეს გადაწყვეტილება. ეს არის ფაქტობრივად, ელიტური კორუფცია, ხელისუფლება დაახლოებულია გარკვეულ ჯგუფთან,რომელმაც ეს ოპერაცია გაანახორციელა და თანხა გაიტანა ბიუჯეტიდან. ისინი კანონზე მაღლა დგანან. ეს ადამიანები ბიძინა ივანიშვილის ნდობით აღჭურვილნი არიან,“- აღნიშნავს ლევან კობერიძე. მისივე განმარტებით, ფრაქციაში საპარლამენტო ყველა ბერკეტს გამოიყენებენ და კრიტიკულ კითხვებზე პასუხს მოსთხოვენ ფინანსთა მინისტრს.
„უნდა დადგეს პრემიერის პასუხისმგებლობის საკითხიც. სად არის ეს გამქრალი ფული, რა ქონება დააყადაღეს, რას მაიმუნობებს, რას დაამსგავსეს ეს ქვეყანა. ასტრალში არიან გასულები, ვეღარც ხვდებიან,რასთან აქვთ საქმე. ის დავალიანება,რომელიც ტელევიზიებს აქვთ, ბიუჯეტიდან მოპარული თანხაა. ბიუჯეტის ფულით უხდიან ტელევიზიები ჟურნალისტებს ხელფასს და ვიღაც ექსპერტებს,რომლებიც ქართულ ოცნებასთან არიან აფილირებულნი. იგივეს აკეთებდა ნაციონალური მოძრაობაც,რომლებიც რუსთავი ორს საზოგადოების წინააღმდეგ და ხელისუფლების პროპაგანდისთვის იყენებდა. ეს არის პოლიტიკური კორუფცია, ტელევიზიების ლოიალობის ყიდვა ბიუჯეტის ხარჯზე.“ - აცხადებს ლევან კობერიძე.
პარლამენტის დამოუკიდებელი დეპუტატი ოპოზიციციას მიმართავს:
„თუ გვინდა,რომ რეალური მსჯელობა გაიმართოს, მოვითხოვოთ, რომ ბიძინა ივანიშვილი მოვიდეს
და დაჯდეს მოლაპარაკების მაგიდაზე. ფასი არ აქვს მის მიერ გამოგზავნილი სუბიექტების
არცერთ სიტყვას. ფაქტია,რომ „ქართულ ოცნებას “მოლაპარაკებები არ უნდა, მას „ნაციონალურ მოძრაობასთან“ ერთად ვადამდელი არჩევნები
აწყობს.
„ქართული ოცნება“ და „ნაციონალური მოძრაობა“ საზოგადოების ზურგს უკან მაჟორიტარ დეპუტატებთან დაკავშირებით, გარიგების პროცესში არიან შესული. კანონით მაქვს იმის უფლება,რომ მე როგორც პარლამენტარს, პოლიტიკოსს მივიღო ინფორმაცია და მე მაქვს ეს ინფორმაცია სხვადასხვა წყაროდან. ადამიანებმა ზუსტად უნდა იცოდნენ, მათ ზურგს უკან რა ხდება,“- ამბობს ლევან კობერიძე.
მოამზადა ნათია კეკენაძემ