თურქეთში დამანგრეველი მიწისძვრების შემდეგ მაშველები ნანგრევებში მოყოლილ ადამიანებს ამ დრომდე ეძებენ. უსახლკაროდ დარჩენილების ნაწილი ღია ცის ქვეშაა. კომერსანტი ესაუბრა საქართველოს მოქალაქეს, რომელიც სტიქიის ზონაშია, ნგრევას მისი საცხოვრებელი სახლი გადაურჩა.
ნანგრევებში ამ დრომდე ეძებენ დაკარგულებს. ამინდიც არ უწყობს პროცესს ხელს, ცივა და ვინც გადარჩა მათი ცოცხლად ამოყვანის შანსები მცირდება. ჩვენ საბედნიეროდ გადავრჩით, თუმცა ბიძგები ამ დრომდე გრძელდება. შეტყობინებები მოგვდის, რომ არსებობს ბიძგების განმეორების საფრთხეც. შლიან კარვებს ქუჩაში დარჩენილებისთვის, მაგრამ ამ სიცივეში იქაც ძალიან გართულდება ალბათ ყოფნა. ტელევიზიით გადმოსცემენ, რომ სხვა რეგიონებში უამრავმა ადამიანმა გამოთქვა გადარჩენილები შეფარების მზაობა. რაც შეეხება ქართველებს, მე ვისთანაც მაქვს კონტაქტი და ვინც გამოდის კავშირზე ყველა ცოცხალია, თუმცა თურქეთში უამრავი ქართველია და ცალკე მათ შესახებ ინფორმაცია არ გვაქვს სამწუხაროდ. — განაცხადა კომერსანტთან თურქეთში მყოფმა საქართველოს მოქალაქემ.