„დავა არ დასრულებულა, ის მიმართავს კანონით მისთვის მინიჭებულ ყველა საშუალებას რათა გააგრძელოს თავისი უფლებების დაცვა.“, - ამის შესახებ ინფორმაცია „კომერსანტს“ რომან ფიფიას წარმომადგენელმა მიაწოდა. საქმე ეხება ინგლისის სასამართლოში BGEO PLC ჯგუფის წინააღმდეგ დაწყებულ სასამართლო პროცესს, რომელიც დღეს საქართველოს ბანკის ჯგუფის განცხადებით BGEO GROUP სასრაგებლოდ დასრულდა. ფიფიას წარმომადგენლის ინფორმაციით, „BGEO Group Limited“ გამოიყენა ფინანსური ზეწოლა, რომელიც მოსარჩელისგან იურიდიული ხარჯების ანაზღაურებას მოითხოვადა. როგორც მედიაჰოლდინგმა გაარკვია საუბარია დაახლოებით 10 მილიონ ფუნტზე, რომლის გადახდაც მოსარჩელ მხარემ ვერ შეძლო.
„2021 წლის 19 აპრილს, ინგლისის და უელსის უმაღლეს სასამართლოში გაიმართა სასამართლო პროცესი რომან ფიფია (ბ-ნი ფიფია, მოსარჩელე) BGEO Group Limited (ყოფილი BGEO GROUP PLC) (BGEO, მოპასუხე) წინააღმდეგ.
მოპასუხემ გამოიყენა ფინანსური ზეწოლის ტაქტიკა და მოსარჩელისგან მოითხოვა იურიდიული ხარჯების ანაზღაურებისათვის, ყოველ ზღვარს გადასული და გაუმართლებლად მაღალი დამატებითი უზრუნველყოფის გადახდა. ეს მოთხოვნა ემსახურებოდა მხოლოდ და მხოლოდ იმ მიზანს, რომ სასამართლოში არ შემდგარიყო საქმის შინაარსობრივი განხილვა. სამწუხაროდ, სასამართლომ დააკისრა მოსარჩელეს დამატებითი უზრუნველყოფის თანხის გადახდა და მოსარჩელემ, მიცემულ მოკლე ვადაში ვერ უზრუნველყო ამ ბრძანების შესრულება და სარჩელი არსებითი განხილვის გარეშე იქნა უარყოფილი. სასამართლოს არ უმსჯელია ფიფიას მიერ BGEO წინააღმდეგ წაყენებულ არცერთ ბრალდებაზე და საქმის წარმოება შეწყვიტა მხოლოდ დამატებითი უზრუნველყოფის არ გადახდის გამო.
ფიფია არ ეთანხმება ამ გადაწყვეტილებას და აპირებს მის გაასაჩივრებას. ბ-ნი ფიფია მიიჩნევს რომ დავა არ დასრულებულა და ის მიმართავს კანონით მისთვის მინიჭებულ ყველა საშუალებას რათა გააგრძელოს თავისი უფლებების დაცვა.
ფიფია თვლის, რომ შპს „რუსთავი აზოტ“-თან მიმართებაში BGEO- ს გარკვეულმა ქმედებებმა მას მნიშვნელოვანი ზიანი მიაყენა. ბატონი ფიფიას მიერ მოთხოვნილი თანხა მინიმუმ 393 მილიონი აშშ დოლარია“, - განმარტავს ბიზნესმენის წარმომადგენელი.
შეგახსენებთ, რომ რომან ფიფიასა და “საქართველოს ბანკის ჯგუფს” რუსთავის აზოტთან დაკავშირებული სასამართლო დავა BGEO Group Limited-ის სასარგებლოდ დასრულდა, - გადაწყვეტილება ინგლისისა და უელსის უმაღლესმა სასამართლომ უკვე გამოიტანა.
როგორც საქართველოს ბანკის ჯგუფის განცხადებაშია მითითებული მოსარჩელე რომან ფიფია ზიანის ანაზღაურებისთვის მოპასუხე მხარისგან, BGEO Group Limited–გან $286 499 892,00 ითხოვდა.
ინგლისისა და უელსის უმაღლესი სასამართლოს მიერ სარჩელის უარყოფა გულისხმობს რუსთავის აზოტის აქტივებზე აღსრულებასთან დაკავშირებით სს საქართველოს ბანკისა და მისი ჯგუფის წევრი კომპანიების წინააღმდეგ წარსულში არსებული ყველა სასამართლო პროცესის დასრულებას, - ნათქვამია განცხადებაში.
იქვე მითითებულია, რომ East West United Bank S.A, Agrochim S.A. და Sistema Holding Limited-ის დაწყებული კიდევ ერთი დავა საქართველოს ბანკის, BGEO ჯგუფის და სხვათა წინააღმდეგ, რომლის ფარგლებში ზიანის ანაზღაურებისთვის მოთხოვილი იყო $93.6 მლნ მოპასუხეთა სასარგებლოდ საქართველოს უზენაეს სასამართლოში 2020 წლის 29 დეკემბერს დასრულდა - სასამართლომ ძალაში დატოვა ორი ქვედა ინსტანციის განაჩენი და განმცხადებლების სარჩელები სრულად გააუქმა.
ბაჩო ადამია
რომან ფიფია
