„ბევრი საერთაშორისო კომპანია, მათ შორის ამერიკული კორპორაციები ჩინეთის ფარგლებს გარეთ გასვლასა და მიწოდების ტრადიცული ჯაჭვის შეცვლაზე ფიქრობენ.საქართველო მზად უნდა იყოს მოიზიდოს სწორედ ისინი, ვინც ახალ საინტერესო ადგილებს ეძებს ინვესტიციებისთვის,“ - ამის შესახებ „კომერსანტთან“აცხადებს ამერიკის სავაჭრო პალატის თავმჯდომარე.
როგორც ცნობილია, აშშ-ს პრეზიდენტმა დონალდ ტრამპმა დამოუკიდებლობის დღესთან დაკავშირებულ მოსალოც წერილში 26 მაისს საქართველოსთან ეკონომიკის დივერსიფიცირების სამომავლო მოლოდინებს გაუსვა ხაზი. „ველი თქვენთან თანამშრომლობას, რათა დავეხმაროთ საქართველოს დემოკრატიული ინსტიტუტების კონსოლიდაციასა და პოლიტიკური პლურალიზმის განმტკიცებაში, კანონის უზენაესობის გაძლიერებაში, რომლის საყრდენს წარმოადგენს დამოუკიდებელი სასამართლო, ასევე - ეკონომიკის დივერსიფიკაცია,“ - ნათქვამია დონალდ ტრამპის მიერ საქართველოს პრემიერ-მინისტრისთვის გამოგზავნილ წერილში.
რას გულისხმობს სტრატეგიული პარტნიორის მხრიდან საქართველოსთან ერთობლივად ეკონომიკურ დივერსიფიცირებაზე აქცენტის გაკეთება? რა სფეროებშია შესაძლებელი ამ კავშირების გაღრმავება? მაიკლ ქაუგილი მიიჩნევს, რომ ტურიზმის უპირველესი დარგია ამ ორი ქვეყნის სამომავლო გეგმების რეალიზებაში, კაპიტალის ბაზრის შექმნასა და სასამართლო სისტემის გაუმჯობესების მიმართულებით კი, საქართველო აშშ-თან ერთობრივი ღონისძიებები უნდა გაატაროს, რათა ის უცხოელი ინვესტორებისთვის მეტად საინტერესო გახდეს, იქცეს სატრანსპორტო ჰაბად.
„საკმაოდ გამამხნევებელი წერილი მივიღეთ პრეზიდენტ ტრამპისგან, რომელიც ცხადყოფს, რომ საქართველო კვლავაც მნიშვნელოვანი სტრატეგიული პარტნიორია აშშ-სთვის. ის, რაზეც საქართველომ ყურადღება უნდა გაამახვილოს, არის ეკონომიკური თანამშრომლობის უმნიშვნელოვანესი ისტორიული სფეროები, ასევე ახალი შესაძლებლობები, რაც შესაძლოა ბოლოდროინდელი პანდემიის შედეგიც იყოს.
საქართველომ, როგორც აშშ-ს, ასევე მსოფლიოს აჩვენა, რომ ეს ქვეყანა უკლავდება Covid-19-თან დაკავშირებულ უსაფრთხოებისა და ჯანდაცვის საკითხებს. საერთაშორისო პარტნიორების, მათ შორის აშშ-ს მხარდაჭერით, საქართველო ბევრს მუშაობს ეკონომიკური და ფინანსური ზარალის შესამსუბუქებლად მოქალაქეებისა და ბიზნესისთვის.
სამომავლოდ, ჩვენ ყველა უნდა ვკონცენტრირეთ ეკონომიკის აღდგენაზე და რათა დავაბრუნოთ ის პრე-პანდემიურ მდგომარეობაში, გავაგრძლოთ ზრდა, გავაუმჯობესოთ დასაქმების დონე და შევამციროთ სიღარიბე. აშშ-სა და საქართველოს შორის თანამშრომლობის ყველაზე აშკარა სფერო ტურიზმია. საქართველოს შეუძლია სიამაყით განაცხადოს, რომ ის უსაფრთხო ქვეყანაა ვიზიტორებისთვის. რა თქმა უნდა, აშშ-სა და საქართველოს შორის უწყვეტი ფრენა ამაში დიდ როლს შეასრულებდა.
კონცეფცია, რომ საქართველო არა მხოლოდ უსაფრთხო ადგილია, არამედ ბიზნესის კეთებისთვის უსაფრთხო ქვეყანაცაა , ძალიან მნიშვნელოვანი მესიჯია. ბიზნესის კეთების სიმარტივეში მეშვიდე ადგილი ძალიან კარგი შედეგია. ჩვენ ამას უნდა დავეყრდნოთ და სხვა მნიშვნელოვანი რეფორმები განვახორციელოთ, როგორიცა სასამართლო სისტემის რეფორმა და კაპიტალის ბაზრის შექმნა. აშშ-ს შეუძლია გახდეს საკვანძო მოკავშირე ამ მიმართულებით. აშშ-ი უკვე უზრუნველყოფს სახაზინო დეპარტამენტიდან მრჩევლის გამოგზავნას კაპიტალის ბაზრის შექმნის ინიციატივის მხარდასაჭერად. ასევე, აშშ და სხვა საერთაშორისო პარტნიორები აგრძელებენ მჭიდრო თანამშრომლობას დაინტერესებულ მხარეებთან სასამართლო სისტემის კომპეტენციისა და გამჭვირვალობის ასამაღლებლად.
ამერიკელ პარტნიორებთან ერთად, ასევე შესაძლებელია საქართველოს სასოფლო-სამეურნეო შესაძლებლობების გაძლიერება. ამის მსგავსად, საქართველოს შეუძლია გახდეს საკვანძო ქვეყანა მანუფაქტურულ წარმოებაში, გახდეს სატრანსპორტო და ლოგისტიკური ჰაბი რეგიონისთვის“,- განმარტავს ამერიკის სავაჭრო პალატის თავმჯდომარე.
მაიკლ ქაუგილმა აღნიშნა, რომ აშშ-საქართველოს სამომავლო ეკონომიკური და სტრატეგიული პარტნიორობა იმედისმომცემია და ამის გასაღრმავებად ბევრი ერთობლივი მუშაობაა საჭირო.
მარიამ მორგოშია
მაიკლ ქაუგილი
