„სამინისტროში ბოლო შეხვედრაზე აგვიფრიალეს ფურცელი, სადაც ჩამოწერილი იყო ის ქვეყნები, სადაც რესტორნები დაკეტილია, მაგრამ მეორე ფურცელი უნდა ყოფილიყო ლოგიკურად, რომელიც გეუბნებოდა, რომელ ქვეყანაშ რა პროცენტით დასუბსიდირდა ეს სფერო. ეს ფურცელი არ მოჰყვა ამ ჩამონათვალს,“ - ამის შესახებ „კომერსანტთან“ რესტორან „შავი ლომის“ მეპატრონემ, რესტორატორმა მერიკო გუბელაძემ ისაუბრა.
როგორც ცნობილია, რესტორნები მთავრობასთან მრავალჯერადი დიალოგის შემდეგ 6 თებერვალს თვითნებურად გახსნას გეგმავენ. რა შედეგი მოჰყვება მსგავს გადაწყვეტილებას და რამ გამოიწვია მსგავსი რადიკალური ნაბიჯი სფეროსგან, ამის შესახებ რესტორატორი მერიკო გუბელაძე გვიყვება, რომ დიალოგი, რაზეც ეკონომიკის სამინისტრო საუბრობს, რეალურად არ არსებობს, და მათი მხრდიან მხოლოდ ფაქტის წინაშე დაყენება ხდება.
„თურნავა ამბობს, რომ აქტიური დიალოგი ჰქონდა რესტორნებთან და მისთვის თითქოს გაუგებარია ჩვენ საერთოდ რაზე ვსაუბრობთ. დიალოგში თუ იგულისხმება ის, რომ სფეროს წარმომადგენლებს პერიოდულად გვიბარებდნენ და გვხვდებოდნენ, მაშინ კი.
გერმანიაში სფეროს სუბსიდირება 67 პროცენტია, სადღაც 80, სადღაც კი - 90 პროცენტი. შემდეგ იყო ამირან გამყრელიძის დემაგოგიური საუბარი იმაზე, თუ როგორ ააფეთქეს ზაფხულში რესტორნებმა ეს ეპიდემია და 300 კაციანმა ქორწილმა რა შედეგები მოგვცა. ადამიანს ისიც არ ესმის, რომ თბილისში 300 კაციანი ქორწილები არ იმართება, ძირითადად არის ბუტიკური რესტორნები. ეს ადამიანები ამ სფეროში არ ერკვევიან, არ გვითანხმებენ და არ გვეკითხებიან. ისიც არ იციან, რომ ლოქდაუნის შემდეგ, როცა გავიხსნენით ისე გვქონდა გადანაწილებული სტუმრები, რომ არანაირი საფრთხე არ ყოფილა. ბევრად უფრო უსაფრთხო ვართ ჩვენი რესტორნებით, ვიდრე სუპერმარკეტის ზედახორა. ამაზე დიდი შერჩევითობა არ არსებობს. ბანკებთან მთავრობამ შუამდგომლობა არ გაგვიწია, ბანკი გვთხოვს გადასახადს. საიდან უნდა მოვიტანოთ საბანკო ვალდებულების გადასახადი. ყველა ჩემს თანამშრომელს აქვს საბანკო ვალდებულება და დარჩნენ 200 ლარის ამარა. რაში მჭირდება მე სახელმწიფო, თუ არა დღეს .. იმედი მაქვს არაფერში დამჭირდება მომავალში. ჩვენი სახელმწიფო კი გველაპარაკება მაღლიდან და გვეუბნება რომ დიალოგი გვაქვს და თუ ჭკუით არ იქნებით, ეს დიალოგიც არ გვექნება. ეს დაცინვაა, რომ გვეუბნება თურნავა, რომ დიალოგი აქვთ ჩვენთან. გვაყუებენ ან თავს იტყუებენ. ჩვენ ვართ გაკოტრების, გაღარიბების, შიმშილობის პირას. ალოგიკურობის პიკია, რაც ჩვენ გვჭირს,“ - განმარტავს მერიკო გუბელაძე.