გიორგი აივაზიანმა ყაზბეგის ქუჩაზე ყავის ლაბორატორია Coffe Lab-ი, 2016 წელს დააფუძნა. ზაფხულის სეზონზე პანდემიის მიუხედავად, ღია სივრცის გამო მომხმარებლების ნაკლებობა კაფეს არ უგრძვნია, თუმცა ზამთარში სიტუაცია შეიცვალა და მიუხედავად იმისა, რომ ამჟამად კომპანია ქსელის გაფართოებისთვის ობიექტებს ფალიაშვილის ქუჩასა და აქსის თაუერში არემონტებს, აივაზიანის თქმით ახალი ქსელების გახსნას აზრი არ აქვს.

Coffee Lab-ი მეოთხე წელია არსებობს და ორი მიმართულებით ავითარებს ქვეყანაში ყავის ინდუსტრიას - ერთი არის კაფე „ყავის ლაბორატორია“ , ხოლო მეორე მიმართულება ყავის დისტრიბუცია ოფისებსა და სხვადასხვა კვების ობიექტებში. როგორც გიორგი აივაზიანი ამბობს, ოფისებისა და რესტორნების დახურვის გამო ყავის დისტრიბუციის მიმართულება დიდ დანაკლისს განიცდის

„კვების ობიექტების გახსნა კარგი იყო, მაგრამ საკმარისი არ არის იმისთვის, რომ გადავრჩეთ ან განვვითარდეთ. საკმაოდ რთული ვითარება გვაქვს. ახლა ერთი ობიექტი გვაქვს და მეორეს , აქსის თაუერშიც დავასრულებთ მაისის ბოლოს, მაგრამ ახლა ვფიქრობ საერთოდ გახსნა ღირს თუ არა. რეგულაციები მაინც რჩება და იმდენად ცოტა ადამიანის განთავსებაა შესაძლებელი, რომ ეს საკმარის შემოსავალს ვერ აგენერირებს იმისთვის, რომ იმუშავო. 50 ადგილიდან მხოლოდ 20 ადამიანს განათავსებ. მთელი ზამთარი არსებული ფილიალის გარე სივრცე რა თქმა უნდა ვერაფერში გამოვიყენეთ.

ქსელის გაფართოებას ვაპირებდით და ბევრად ამბიციური გეგმები გვქონდა, მაგრამ მიღწევები ბუნებრივია არ გვაქვს. არ მაქვს მოლოდინი, რომ რამის აღდგენის წელი იქნება და ვერ ვარ ობტიმისტურად განწყობილი. 2022 წელს იმედია ყველაფერი დალაგდება. ახლა ლოქდაუნის გამო რემონტი გაიწელა, მაღაზიები დაკეტილი იყო და შესაბამისად მასალები ფიზიკურად ონლაინ რეჟიმში ვერ შევარჩიეთ. რომც დავასრულოთ რემონტი, არანაირად არ გავხსნი ობიექტს კომენდანტის საათის პირობებში. გამოდის, რომ 7 ზე უნდა დავიხუროთ, რომ თანამშრომლებმა სახლებში მიასწრონ. ტურიზმის არ არსებობაც რა თქმა უნდა აფერხებს ამ პროცესს,“ - ამბობს „ყავის ლაბორატორიის“ დამფუძნებელი.

კომპანია უკვე ოთხი წელია როგორც კომერციულ ინდუსტრიულ ყავას, ასევე ლიმიტირებული ტიპის სპეციფიურ მარცვლებს ამუშავებს, რომელიც უფრო ძვირადღირებულია და მსოფლიოს ყავის მოსავლის 3-4 პროცენტს შეადგენს.

Coffee Lab-ის გაფართოების და ახალი ობიექტების გახსნის საინვესტიციო მოცულობა 150 ათასი დოლარია. 

„რაც შეეხება ყავის დისტრიბუციის პროცესს, ესეც გაჩერებულია. ბევრი ოფისი ჯერ კიდევ არ გახსნილა. რესტორნების რაღაც რაოდენობა საბოლოოდ დაიხურა, მაგრამ რაღაც ნაწილი ვფიქრობ გააქტიურდება. ჩვენი პარტნიორების დიდი ნაწილი არის ისეთ ადგილებში, რომელიც ტურიზმზე იყო დამოკიდებული. სანამ ტურიზმი არ აღდგება, რამეზე საუბარი ზედმეტია.

მე ვარ პარტნიორი „ჯივინოში“, რომელიც ერეკლე მეორის ქუჩაზე მდებარეობს. ზაფხულში ეს ობიექტი  2 თვით გავხსენით, თუმცა ზარალით ვატარეთ კომპანია და მერე ისევ დავხურეთ. შეზღუდვებიც რომ მოიხსნას, იმდენად არ დადის ადგილობრივი ამ ქუჩებში, რომ აზრი არ აქვს რამის ამუშავებას.  ზოგ ობიექტს მეიჯარეებთანაც პრობლემები ჰქონდა. „ჯივინოს“ მსგავსი კომპანიები არც აპირებენ გახსნას და შესაბამისად დისტრიბუციის ნაწილიც განულებულია,“ - განმარტავს გიორგი აივაზიანი.

ერეკლე მეორის მოედანზე, სადაც ძველ თბილისს მორგებული 15-ამდე სხვადასხვა ბარი თუ რესტორანი მუშაობდა, დღეს სამამდე ბარია დარჩენილი. ერთ-ერთია ნატურალური ღვინის ბარი „ჯი.ვინო“, რომელიც 2015 წელს შეიქმნა.