ჟურნალ სარკესთან ინტერვიუში ბერა ივანიშვილმა საინტერესო რამ თქვა. ცნობილმა მუსიკოსმა, რომელმაც ამასწინათ ხანძრისგან გაჩანაგებული ამაზონის ტყეების საშველად სოლიდური თანხა გაიღო, საჯაროდ პირველად დააფიქსირა... ქართულ ფეხბურთში მოსვლის სურვილი. აი, რა თქვა მან:
დროა, საქართველოსაც ჰყავდეს ძლიერი კლუბი, რომელიც სხვადასხვა ტურნირებზე თავის სიტყვას იტყვის... ქართული ფეხბურთის ერთ-ერთ კლუბს ვიყიდი და მსოფლიოში საუკეთესო კლუბად ვაქცევ. ასევე, მსურს ბევრმა ბიზნესმენმა რამდენიმე კლუბი იყიდოს და ასე საქართველოს ჩემპიონატი უფრო წინ წაიწევს, ასევე, ეროვნული ნაკრებიც და ჩვენ ყველა დაგვაფასებს ფეხბურთში, - მოჰყავს ასავალ-დასავალს ბერა ივანიშვილის ციტატა ჟურნალ სარკიდან.
დღეს ქართულ ფეხბურთში მიზერულია კერძო ინვესტიცია და სურვილი, რომელიც ბერა ივანიშვილს გაუჩნდა, უდავოდ მისასალმებელია, მით უმეტეს, თუ ეს სურვილი რეალობად იქცევა.
ოღონდ, ეგ არის, რომ ჩვენს ფეხბურთს მარტო დიდი ფული კი არა, ამ ფულის სწორად და ეფექტიანად მხარჯველებიც სჭირდება, თორემ აქამდეც გადაყრილა წყალში ქართული ფეხბურთის ფული და თუ კარგი მენეჯერები არ გვეყოლა, კიდევ გადაიყრება.
lelo.ge