„გერმანიაში საქართველოს მოქალაქეების დროებითი დასაქმების შესახებ ორ ქვეყანას შორის დადებული შეთანხმება არის ევროკავშირის ქვეყნებთან ჩვენი ქვეყნის სამართლებრივად გამართული, სწორი ეკონომიკური ინტეგრაციის კიდევ ერთი საშუალება, რომლიდანაც ყველაზე სწრაფად არის შესაძლებელი ეკონომიკური სარგებლის მიღება და ამასთან ამ ქვეყნებთან მომავალი სრულფასოვანი შრომითი მიგრაციის შეთანხმებებისთვის საჭირო მნიშვნელოვანი წინაპირობა“ - ამის შესახებ პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარის პირველმა მოადგილემ ბექა ლილუაშვილმა განაცხადა.

როგორც ბექა ლილუაშვილი აღნიშნავს, გერმანიაში საქართველოს მოქალაქეების დროებითი დასაქმების შესახებ ორ ქვეყანას შორის დადებული შეთანხმება უზრუნველყოფს იმას, რომ საქართველოს მოქალაქეები, რომლებიც არალეგალურად მიდიოდნენ საზღვარგარეთ სამუშაოდ, გერმანული მხარის მიერ ლეგალური დასაქმების საშუალებით უზრუნველყოფილი იქნებიან უსაფრთხო და ღირსეული სამუშაო გარემოთი.

მისივე თქმით, აღნიშნული საშუალებას მისცემს ჩვენს მოქალაქეებს, მათთვის ხელმისაწვდომი იყოს მიგრანტების შრომითი და სოციალური უფლებების, ასევე ჯანმრთელობის დაცვის მექანიზმები.

„ამის გათვალისწინებით, ცხადია ეს შეთანხმება უზრუნველყოფს ევროკავშირთან უვიზო მიმოსვლის პირობების დაცვას და „შეჩერების მექანიზმის“ ამოქმედების ალბათობის მინიმუმამდე დაყვანას. ქვეყნებს შორის მსგავსი ტიპის შეთანხმებები თანამშრომლობის მიღებული ფორმაა, რომელიც ორმხრივად სარგებლიანია არალეგალური დასაქმების შემცირების და მაღალანაზღაურებადი, სეზონური დასაქმების უზრუნველყოფის მიზნით, განსაკუთრებით ეკონომიკური სირთულეების და კრიზისის დროს. ეს არის ევროკავშირის ქვეყნებთან ჩვენი ქვეყნის სამართლებრივად გამართული, სწორი ეკონომიკური ინტეგრაციის კიდევ ერთი საშუალება, რომლიდანაც ყველაზე სწრაფად არის შესაძლებელი ეკონომიკური სარგებლის მიღება და ამასთან ამ ქვეყნებთან მომავალი სრულფასოვანი შრომითი მიგრაციის შეთანხმებებისთვის საჭირო მნიშვნელოვანი წინაპირობა.“ - განაცხადა ბექა ლილუშვილმა.

(NS)