ჯერი ახლა ოპოზიციასა და ნიკა მელიაზეა. ახლა მან უნდა აიღოს პასუხისმგებლობა და წარდგეს სამართლის წინაშე, - ამის შესახებ ფრაქცია „ქართული ოცნების“ თავმჯდომარის მოადგილემ ბექა დავითულიანმა ჟურნალისტებს განუცხადა.

მისი თქმით, გიორგი გახარიამ თავისი გადაწყვეტილებით ქართული პოლიტიკიდან რადიკალიზაციის ფაქტორი გამორიცხა.

„სამართლის აღსრულებასთან დაკავშირებით აზრთა სხვადასხვაობა გუნდის შიგნით არ ყოფილა. აზრთა სხვადასხვაობა იყო, თუ როდის უნდა აღსრულდეს სასამართლო გადაწყვეტილება. ვინაიდან გიორგი გახარია 20 ივნისს შინაგან საქმეთა მინისტრი იყო და ოპოზიციის მხრიდან მისი ფაქტორი გამოყენებული იყო სპეკულაციურად და დაკავშირებული ამ საკითხთან, როგორც რადიკალიზაციის ფაქტორი, მან თავისი გადაწყვეტილებით ეს ფაქტორი ქართული პოლიტიკიდან გამორიცხა. შედეგად, ჯერი ახლა ოპოზიციასა და ნიკა მელიაზეა. ახლა მან უნდა აიღოს პასუხისმგებლობა და წარდგეს სამართლის წინაშე“, - განაცხადა დავითულიანმა.

მისივე თქმით, გახარიას გადაწყვეტილების შესახებ პირადად მისთვის უცნობი იყო.

„როგორ მეცოდინებოდა, სასამართლოს შემდეგ განვითარდა ეს მოვლენები. ლიდერებს შორის იყო საუბარი, სადაც გიორგი გახარიას განსხვავებული პოზიცია ჰქონდა“, - განაცხადა დავითულიანმა.

მისივე თქმით, პოლიტსაბჭო მიიღებს გადაწყვეტილებას, თუ ვინ წარადგინოს პრემიერ-მინისტრის კანდიდატურაზე.

imedinews.ge