ბენზინის გაძვირებას ბუნებრივი და თხევადი აირებიც მიჰყვა. ბოლო პერიოდის განმავლობაში მცირე ინტერვალებით მატულობს ფასი. ამ დროისთვის 1 კბ/მ ბუნებრივი გაზი 1,55 ლარი ღირს, ხოლო თხევადი აირის (LPG) ღირებულება 1,70 ლარია. თუმცა უფრო ძვირი ღირდა ზაფხულის განმავლობაში, რაც პროდუქტის დეფიციტით იყო გამოწვეული.
თხევადი გაზის ასოციაციის ხელმძღვანელის, იმპორტიორი ნიკა ხოფერიას ინფორმაციით, ავტოგაზი ამ ეტაპზე უკვე მსოფლიო ბაზარზე მიმდინარე ტენდენციების გამო ძვირდება.
,,ნედლი ნავთობის ფასები გაზრდილია და ეს ტრენდი ყველა სახეობის პროდუქტზე გავრცელდა. შესაბამისად, ნავთობპროდუქტების ყველა სახეობა ძვირდება, რაც გლობალური ფაქტორით არის გამოწვეული, შესაბამისად, მატულობს ფასი. თხევადი გაზის ფასმა თავის პიკს მიაღწია ზაფხულში, როცა თითქმის 2 ლარამდე გაძვირდა. დღესდღეობით სიტუაცია მეტნაკლებად დარეგულირდა. ბუნებრივი გაზის შემთხვევაში საქმე გვაქვს სხვა მოცემულობასთან. 2,5-ჯერ და მეტჯერ გაიზარდა მისი ღირებულება ევროპასა და სხვა ბაზრებზეც. უფრო მაღალ ფასში მოგვეწოდება ამ ეტაპზეც, ვიდრე შარშან ღირდა. უფრო ინერციული პროცესებია და საფასო რყევებს აქვს ადგილი, რაც მომავალშიც გაგრძელდება“, - ამბობს ხოფერია ,,კომერსანტთან“.
მისივე თქმით, თხევადი აირის ბაზარზე დეფიციტთან დაკავშირებული პრობლემა მოგვარებულია და ამ მხრივ ბაზარზე რაიმე ცვლილება მოსალოდნელი არ არის.
რაც შეეხება ნავთობის ფასს გლობალურ ბაზრებზე, 2021 წლის 21 დეკემბრის ვაჭრობის შედეგებით მსოფლიოს წამყვან ლონდონისა და ნიუ-იორკის სანავთობო ბირჟებზე „შავი ოქროს“ ფასი გაიზარდა.
კერძოდ, ლონდონში Inter Continental Exchange Futures Europe-ზე (ICE Futures Europe)-Brent-ის მარკის ნავთობის ფასმა 73,98 (+ 2.46) დოლარი/ბარელზე შეადგინა.
ნიუ-იორკში York Mercantile Exchange-ზე (NYMEX) - Light Sweet მარკის ნავთობის ფასმა შეადგინა 71,12 (+ 2.51) დოლარი/ბარელზე.
წინა კვირას მსოფლიო ბაზარზე ნავთობის ფასები 2-3%-ით შემცირდა, რაც კორონავირუსის ახალი შტამით გამოწვეული შეშფოთებით არის განპირობებული.
მარი ჩიტაია