6 თვეში ნავთოპროდუქტების იმპორტი, გასული წლის ანალოგიურ პერიოდთან შედარებით, $96 მლნ-ით $327 მლნ-მდე გაიზარდა, იანვარ-ივნისში რაოდენობრივმა ზრდამ 6.7%-ს მიაღწია, თანხობრივმა კი 41.3%-ს. დისბალანსის უმთავრესი მიზეზი საერთაშორისო ფასების გაორმაგებაა. 

გასული წლის დასაწყიში Brent-ის მარკის ბარელი ნავთობის ფასი $69-ს აღწევდა. კლება უკვე იანვრიდანვე, მას შემდეგ დაიწყო, რაც კოვიდის გამო ჩინეთში მოთხოვნა შემცირდა. საუდის არაბეთსა და რუსეთს შორის მოპოვების შემცირების თაობაზე ჩაშლილი მოლაპარაკებების გამო 8 მარტს ერთ ღამეში „შავი ოქრო“ 35%-ით $33-მდე გაიაფდა, აპრილში კი XXI საუკუნის ანტირეკორდი მოხსნა და $18-მდე დაეცა. ამერიკული მსუბუქი ნავთობი კი მინუსში გავიდა და ისტორიულ მინიმუმი -$38 დააფიქსირა. მსგავსი მასშტაბის ვარდნა არ მომხდარა პლატსზე, საიდანაც საქართველო უკვე გადამუშავებულ საწვავს ყიდულობს, თუმცა საწვავის იმორტი მაინც $259 მლნ-ით $498 მლნ-მდე შემცირდა, რაოდენობრივად კი მცირედით 0.9%-ით 1.106 მლნ ტონამდე გაიზარდა, რაც არა მოხმარების ზრდით, არამედ მარაგების შექმნით იყო გამოწვეული.

OPEC+ კარტელმა ფასების უპრეცედენტო ვარდნას, მოპოვების ასევე უპრეცედენტო 10%-იანი შემცირებით უპასუხა, რის შემდეგაც უკვე ივნისში ბარელის ღირებულებამ $40-ს გადააჭარბა, დეკემბერში კი, კოვიდვაქცინის გამოჩენისთანავე, $50-ს ბარელზე. დღეს ფასი უკვე პანდემიამდელ ნიშნულს აჭარბებს და $74-ს აღწევს.

მიმდინარე წლის იანვარ-ივნისში რაოდენობრივად ბენზინისა და დიზელის იმპორტი გასული წლის ანალოგიურ პერიოდთან შედარებით 6.9%-ით, ხოლო 2020 წლის იანვარ-ივნისთან შედარებით 7.7%-ით 532 ათას ტონამდე გაიზარდა. ბენზინის იმპორტი დიზელისას უტოლდება და თითოეულ შემთხვევაში 266 ათას ტონას უდრის.

ბენზინის ბაზარზე რეგულარი დომინირებს და მისი წილი 65.6%-ს აღწევს, პრემიუმზე 32.3% მოდის, სუპერზე კი 2.1%.

ბოლო 2.5 თვეში ლარის გამყარებამ საწვავზე ფასების ზრდა ვერ შეაჩერა. ბრენდირებულ ავტოგასამართ სადგურებზე ყველაზე იაფაიანი რეგულარის ტიპის ბენზინის ღირებულებაც კი 2.90-ს აჭარბებს და 2.99-მდე ადის, პრემიუმის ფასი 3.05-დან იწყება და 3.14-მდე ადის. დიზელის ფასი კი 2.82-დან იწყება და 3.02-მდე ადის.