2021 წელს საქართველოში ბენზინის იმპორტი 2020 წელთან შედარებით 8.7%-ით 587 ათას ტონამდე გაიზარდა, დიზელის 0.7%-ით 562 ათას ტონამდე შემცირდა, მთლიანად საწვავის იმპორტი კი 3.9%-ით 1.149 მლნ ტონამდე გაიზარდა. ბენზინის იმპორტში რეგულარმა 64%-იანი წილი დაიკავა, პრემიუმმა 34%-იანი, ხოლო სუპერმა 2%-იანი. ამის შესახებ ინფორმაციას ნავთობპროდუქტების იმპორტიორთა კავშირი ავრცელებს.
ორივე სახეობის საწვავის ჯამურ იმპორტში 245 ათასი ტონით თურქმენეთი პირველ ადგილს იკავებს, 221 ათასი ტონით მეორე ადგილზე რუსეთია, 216 ათასი ტონით აზერბაიჯანი მესამე ადგილს იკავებს, 205 ათასი ტონით რუმინეთი მეოთხე ადგილზეა, ხუთეულს 168 ათასი ტონით ბულგარეთი ასრულებს. ამ ქვეყნების გარდა, საბერძნეთიდან, იტალიიდან, თურქეთიდან და ყაზახეთიდან ჯამში 100-ტონამდე საწვავი შემოვიდა.
საქართველოში უმნიშვნელოდ — 1%-ით საწვავის იმპორტი 2020 წელსაც გაიზარდა, რაც უფრო იაფი ნავთობის პირობებში მარაგების შექმნით იყო გამოწვეული, ვიდრე მოხმარების ზრდით.
კოვიდრეგულაციები 2020-ის მსგავსად 2021-შიც გაგრძელდა. 17 მაისამდე კომენდანტის საათი 21:00 სთ-დან იწყებოდა, 17 მაისიდან 1-ელ ივლისამდე კი 23:00 სთ-დან, რამაც საწვავის მოხმარების ზრდის ტემპის ბუნებრივად შეამცირა, ამ ყველაფერს ისიც დაემატა, რომ ტურიზმი, პანდემიამდელ პერიოდთან შედარებით, მხოლოდ 30%-ით აღდგა, თუმცა 2020-ისგან განსხვავებით, როცა მოძრაობა აკრძალული იყო, ქუჩები აღარ დაცარიელებულა.
ისევე როგორც მსოფლიოში, ელექტრომობილების რაოდენობა საქართველოშიც იზრდება, მაგრამ ბევრად უფრო დაბალი ტემპით. 2021 წლის 1-ლი იანვრის მდგომარეობით ქვეყანაში სულ ჯამური ავტოპარკის 0.18% - 2187 ელექტრომობილი იყო რეგისტრირებული, რაც საწვავის მოხმარების კლებაზე გავლენის მოსახდენად აბსოლუტურად არასაკმარისია.
საქართველო მცირე ოდენობით — 30-50 ათას ტონა ნავთობს თავადაც მოიპოვებს, მაგრამ ნავთობგადამამუშავებელი ქარხნის არარსებობის გამო ნედლეული ექსპორტზე გააქვს, ნავთობპროდუქტების 100% კი იმპორტის გზით შემოაქვს.