ბელგიის ხელისუფლებამ კორონავირუსის საკითხებში სამთავრობო კომისარი დანიშნა. მთავრობამ განმარტა, რომ ახალი პოსტის შემოღების აუცილებლობა კორონავირუსის მეორე ტალღამ და მჭიდრო კოორდინაციის აუცილებლობამ გააჩინა. კოვიდ-19-ის საკითხებში კომისარი 39 წლის პედრო ფაკონია. ფაკონი ამბობს, რომ ხარვეზები ჯერ კიდევ არის, მაგრამ ბელგია გაცილებით კარგად არის მომზადებული მეორე ტალღისთვის.
„პირბადეების, სადეზინფექციო საშუალებების, სამედიცინო აღჭურვილობის მარაგები გვაქვს. დღეს გაცილებით დიდი ცოდნა გვაქვს ვირუსზე, ვიდრე მარტში. სიკვდილიანობის მაჩვენებელი დაბალია და ჩვენ დღეს უკეთ შეგვიძლია ხანდაზმულების დაცვა. ჩვენ ზომებს ვიღებთ დღეს, რადგან ხვალ არ დაგვჭირდეს ქვეყნის სრული დახურვა. სიტუაცია შემაშფოთებელია, სერიოზულია, მაგრამ კრიტიკული არ არის. ჩვენ უნდა გავაკეთოთ მაქსიმუმი იმისათვის, რომ საავადმყოფოებზე არ იყოს ზეწოლა. დღესდღეობით უკეთესად მუშაობს კონტაქტების დადგენის პროცედურა. სპეციალური ფორმა, რომელიც კონტაქტების აღრიცხვის მიზნითაა შემოღებული მილიონზე მეტმა ჩვენმა მოქალაქემ შეავსო. წითელი ზონიდან დაბრუნების შემდეგ ტესტირება სავალდებულოა და ესეც შეამცირებს ვირუსის გავრცელების რისკს. გასაუმჯობესებელია და დასახვეწი ტესტირების სისტემა და პროცედურები. თუ პაციენტს ტესტის პასუხის მისაღებად რამდენიმე დღე უწევს ლოდინი, მაშინ ტესტის გაკეთება აზრს და მის მთავარ დანიშნულებას კარგავს. დამატებითი განმარტების გაკეთებაა საჭირო, რადგან თუ ვამბობთ, რომ ე.წ. აგრესიული ტესტირებაა ძირითადი სტრატეგია, მაშინ პასუხიც პაციენტმა სწრაფად უნდა მიიღოს. დღესდღეობით ლაბორატორიებს შეუძლიათ 60 000-დან 65 000-მდე ტესტის დამუშავება, თუ 65 000-ს გასცდა რაოდენობა, მაშინ მოქალაქეებს ლოდინი უწევთ და ტესტირებაც თავის მთავარ არსს კარგავს. ამ პრობლემის გადაჭრა ერთ დღეში შეუძლებელია, რადგან ლაბორატორიებს ახალ გამოწვევებთან გასამკლავებლად დრო და რესურსი სჭირდებათ. ნოემბრის დასაწყისისთვის ლაბორატორიებს მეტი ტესტის დამუშავების შესაძლებლობა უნდა ჰქონდეთ და წლის ბოლომდე 100,000-მდეც უნდა ავიდეთ. PCR ტესტირებას დაემატება სწრაფი ტესტირებაც. ჩემი მოვალეობაა სტრატეგიის შემუშავება და მისი მინისტრებისთვის წარდგენა“, - განაცხადა ფაკონმა ბელგიურ რადიო 1-ელთან საუბრისას.
imedinews.ge