ვითარება ევროკავშირის და ბელარუსის საზღვარზე ყოველდღიურად რთულდება - თუ აქამდე მინსკელი დიქტატორის ალექსანდრ ლუკაშენკოს მიერ შეგზავნილი ლტოლვილები ახლო აღმოსავლეთის ქვეყნებიდან მის გადაკვეთად შედარებით უხმაუროდ ცდილობენ, დღეს მათი ნაწილი უკვე პირდაპირ შეტევაზე გადადის.

რამდენიმე დღის წინ მიგრანტთა ჯგუფმა პოლონელ მესაზღვრეებს ქვები დაუშინა, საპასუხოდ, რეგიონში ჯარისკაცების რაოდენობას ზრდიან. ეს არ იყო ერთადერთი შემთხვევა - უკანონო მიგრანტებმა ბელარუსიდან პოლონეთში ძალით შეჭრა რამდენიმეჯერ სცადეს.

პოლონეთის სასაზღვრო სამსახურის მიერ გაკეთებულ ვიდეოჩანაწერში ჩანს, რომ მათ საზღვარზე აგებული კონსტრუქციები დაანგრიეს, შემდეგ ორჯერ, სხვადასხვა მონაკვეთზე 60-70 კაცისგან შემდგარმა ჯგუფებმა მესაზღვრეებზე იერიში მიიტანეს, მათ შორის ქვებიც დაუშინეს.

ძალადობრივი ქმედებები ასევე პოლონურ სოფელ უსნარჟ-გურნისთან დაფიქსირდა, სადაც 30-მა ლტოლვილმა კარავი პირდაპირ სასაზღვრო ზოლში გაშალა. მათ ასევე სცადეს საზღვრის გარღვევა, თუმცა, პოლონელებმა შეტევის მოგერიება მოახერხეს.

ქვეყნის სასაზღვრო სამსახურის ინფორმაციით, ამის შემდეგ ლტოლვილებმა ბანაკი მიატოვეს და ბელარუსში დაბრუნდნენ, ხოლო მათ ცარიელ კარვებს ბელარუსი მესაზღვრეები იცავენ. ასევე არის ინფორმაციაც, რომ ერაყიდან, სირიიდან, ლიბიიდან და ირანიდან ჩამოსულ არალეგალებს ბელარუსული სასაზღვრო სამსახური ტანსაცმლით და კვების უზრუნველყოფს.

ასობით ლტოლვილი ახლო აღმოსავლეთიდან ბელარუსიდან ევროკავშირში შეღწევას ყოველდღე ცდილობს. მხოლოდ წინა კვირის პარასკევ-შაბათს პოლონეთის სასაზღვრო სამსახურმა 1338 არალეგალი და მათთან ერთად 7 ბელარუსი შუამავალი დააკავა. თუმცა, არალეგალების ნაწილი შემოსვლას მაინც ახერხებს და ევროკავშირის კანონმდებლობით, ამის შემდეგ მათი პირდაპირი დეპორტაცია შეუძლებელია - ისინი თავშესაფარს ითხოვენ, რასაც თვეების მანძილზე განხილვა სჭირდება და მხოლოდ უარის მიღების შემდეგ არის შესაძლებელი მათი დაბრუნება ბელარუსში.

ამ დროისთვის პოლონეთის მიგრაციულ ბანაკებში ბელორუსიდან შემოსული 1700 მიგრანტია განთავსებული. თავშესაფრის მოთხოვნაზე უარის თქმის შემდეგ დეპორტირებულია ჯერ მხოლოდ 400 ადამიანი.

პოლონეთის თავდაცვის მინისტრმა მარიუშ ბლაშაკმა განაცხადა, რომ ბელარუსთან საზღვარს დღეს 2 500 ჯარისკაცი იცავს, რაც არასაკმარისია და ეს რაოდენობა 10 000-მდე გაიზრდება. საუბარია მხოლოდ რეგულარულ ჯარზე, თუმცა, საზღვარზე განლაგებული ჯარისკაცების, პოლიციელების და მესაზღვრეების საერთო რაოდენობა 14 000-ს აღწევს. პოლონეთში უკვე მუშაობენ 400-კილომეტრიანი ჯებირის აშენების გეგმაზე, რომელიც 350 მლნ. ევრო დაჯდება.

ლიეტუვა, რომელიც მიგრანტების დარტყმის პირველი ობიექტი აღმოჩნდა, ასევე აშენებს ანალოგიურ ინფრასტრუქტურას და ამ პროექტის დაფინანსების საკითხშო ბრიუსელის იმედი აქვს.

faz.net