„ჩვენი პროდუქციის ღირებულება 4-6% -ით გაიზარდა, რაც სხვადასხვა ფაქტორებით არის განპირობებული“ - ამის შესახებ „კომერსანტს“ ტექნიკის კომპანია „ბეკო“— ს გენერალურმა დირექტორმა მეჰმედ მელექმა განუცხადა.
მისი განმარტებით, ფასების ცვლილება სამი მიზეზით არის განპირობებული, ესენია: 1.ტრანსპორტირებაზე ფასის ზრდა 2.ლარის კურსი 3. ჩინეთში ტექნიკის ნაწილების და კომპონენტების ფასის ზრდა.
„პანდემიამდე ჩინეთიდან ტექნიკის კონტეინერით ტრანსპორტირება 3200-3500 დოლარამდე გვიდჯებოდა, პანდემიის პირობებში კი ტრანსპორტირების ღირებულება 8000-9000 დოლარამდეა გაზრდილი. გარდა ამისა, 2020 წლის დასაწყისში თუ არ ვცდები ლარის კურსი დაახლოებით 2,75-2,85 იყო წლის ბოლოს კი 3,30.
ყველა ბრენდი ჯართს ჩინეთში ყიდულობს, რისი ფასიც გაიზარდა. სწორედ ეს სამი მიზეზი გახდა ბეკოში პროდუქტებზე ფასის გაზრდის მიზეზი, ეს არა მხოლოდ ბეკოს, არამედ ყველა ბრენდს შეეხო, შესაბამისად სხვებსაც ან უკვე გაზრდილი აქვთ, ან მომავალში გაზრიდან ფასებს“, - აღნიშნა მეჰმედ მელექმა.
მეჰმედ მელექის განმარტებით, ბეკოსთვის თებერვლის თვე ძალიან კარგად დაიწყო და 2020 წლის თებერვლის პირველ კვირასთან შედარებით 35-40%-ით მეტი პროდუქცია გაიყიდა. რაც შეეხება იანვარს, შეზღუდვებიდან გამომდინარე ნაკლები რეალიზაცია ჰქონდათ თუმცა ონლაინ გაყიდვების მიმართულებით კომპანია მაინც მუშაობდა.
„რადგან იანვარში მაღაზიები დაკეტილი იყო, ისეთი რეალიზაცია არ გვქონია, თუმცა ზოგადად ონლაინ მუშაობა 2020 წელს 2019 წელთან შედარებით 169% -ით არის გაზრდილი, რაც შეეხება კონკრეტულად ბეკოს ტექნოშოპს, ჩვენმა ზრდამ ონლაინ გაყიდვების მიმართულებით 122% შეადგინა“, - განმარტა მეჰმედ მელექმა.
მეჰმედ მელექმა პანდემიის დროს ოთხი ყველაზე გაყიდვადი პროდუქტი დაასახელა, ესენია: კომპიუტერები, საყინულე მაცივრები, გაზქურები და ტელევიზორები.
„ხალხი კარანტინში იყო და ონლაინ სწავლას და მუშაობას აგრძელდებდა, შესაბამისად ყველაზე მოთხოვნადი პროდუქტი კომპიუტერი და ტელეფონი გახლდათ, გარდა ამისა ადამიანები საჭმელების მომზადებას სწავლობდნენ და მოთხოვნა გაზქურებზეც გაიზარდა. ადამიანების ნაწილი მესამე ტალღაზე და კვლავ ჩაკეტვაზე ნერვიულობდა, ამიტომ საკვების მომარაგება და შენახვა გადაწყვიტეს, აქედან გამომდინარე კარგად იყიდებოდა საყინულე მაცივრები ე.წ. ფრიზერები. თებერვალში გაყიდვების დიდი წილი სარეცხ მანქანებზე და წვრილ ტექნიკაზე მოდიოდა“, - აღნიშნა მეჰმედ მელექმა.
მეჰმედ მელექი აღნიშნავს, რომ ბეკოს პროდუქციის შემოტანა პანდემიის დროსაც არ გაუჩერებია, რადგან არ სურდათ რომ მომხმარებლისთვის დისკომფორტი შეექმნათ. რაც შეეხება სამომავლო გეგმებს, იმ შემთხვევაში თუ კორონავირუსის მესამე ტალღა არ წამოვიდა და ყველაფერი არ ჩაიკეტა, „ბეკო“ გაფართოვებას და რეგიონებში ფილიალების დამატებას გეგმავს.
„თუ ყველაფერი კარგად იქნება, ლარის კურსი აღარ გაიზარდა, ვირუსის მესამე ტალღა არ დაიწყო და არ ჩავიკეტეთ, გაფართოვებას ვაპირებთ. პატარა რეგიონები დარჩა, სადაც ბეკო არ არის წარმოდგენილი და წლის მეორე ნახევარში იმ რეგიონებშიც ვგეგმავთ მაღაზიების გახსნას“, - თქვა მეჰმედ მელექმა.
თაკო კვაჭანტირაძე