კომპანია Beard.ge, რომელიც მამაკაცებს თავის მოვლის საშუალებებს სთავაზობს, პროდუქციის ონალინ გაყიდვების პლატფორმა Amazon-ზე განთავსებას გეგმავს.

ამ დროისთვის კომპანიის პროდუქცია ექსპორტზე გერმანიაში, აზერბაიჯანში, ირანსა და ყატარში გადის, ხოლო დუბაიში ბრენდის ფრენჩაიზი გაიყიდა და ცენტრალურ მოლში Beard.ge-ს ფილიალი გაიხსნა.

როგორც „კომერსანტს“ Beard.ge-ს გენერალურმა მენეჯერმა ლუკა ცარელაშვილმა განუცხადა, კომპანია აშშ-ში პროდუქტის გატანისთვის ემზადება.

„ამ დროისთვის, მთავარი ფოკუსი ჩვენი პროდუქციის წარმოებასა და ექსპორტზე გვაქვს. ჩვენს სამომავლო გეგმებში დედაქალაქსა და რეგიონებში შედარებით დიდი მაღაზიების გახსნა შედის. ასევე პროდუქციის აშშ-ში ექსპორტი და Amazon-ზე განთავსება გვსურს.

ზოგადად ჩვენი კომპანიის მთავარი არსი და ძირითადი მიზანი, მომხმარებლისთვის ისეთი პროქდუციისა და სერვისის შეთავაზებაა, რაც სასიამოვნოდ გაკვირვებულს  დატოვებს მას. იმედი გვაქვს, რომ მსგავსი მიდგომით სხვა კომპანიებსაც ვუბიძგებთ სერვისის დონის ამაღლებისაკენ და ქვეყანაში გაუმჯობესდება არსებული ვითარება, ამის ნათელი მაგალითი კი Beard.ge იქნება.“ - განმარტავს ლუკა ცარელაშვილი.

პანდემიის პირობებში, Beard.ge-საც ჰქონდა კრიზისული პერიოდი, თუმცა მუშაობას აქტიურ რეჟიმში აგრძელებდნენ. მომხმარებლებისთვის უფრო კომფორტული გარემოს შესაქმნელად კი მთელი საქართველოს მასშტაბით მიწოდების სერვისი უფასო გახადეს. გარდა ამისა, როგორც კომპანიაში აღნიშნეს რომ განსაკუთრებული თანადგომა მომხმარებლების მხრიდან წამოვიდა, რომლებიც ქვეყანაში ონლაინ გაყიდვების აკრძალვის შემდეგაც პროდუქციას სამომავლოდ უკვეთავდნენ.

„აპრილის თვეში, როდესაც ონლაინ ვაჭრობაც აიკრძალა და ფაქტიურად ყველაფერი დაპაუზდა, რა თქმა უნდა, ჩვენც რთული პერიოდი დაგვიდგა, რომელიც ჩვენი ერთგული მომხმარებლების დახმარებით დავძლიეთ. მიუხედავად მასშტაბური კრიზისისა, ონლაინ-შეკვეთების რაოდენობა, პირიქით, საგრძნობლად იზრდებოდა. ჩვენი სუპერ მომხმარებლები ანგარიშსწორებას წინასწარ ახორციელებდნენ ბარათით, კომენტარის ველში გვიწერდნენ, რომ არ ეჩქარებოდათ და როდესაც მიწოდების სერვისი აღდგებოდა, მაშინ მიგვეტანა მათ მიერ შეძენილი პროდუქცია.

ძალიან დიდ მადლობას ვუხდით ამხელა მხარდაჭერისათვის, რომ დაგვეხმარნენ კრიზისის დაძლევაში. სწორედ მათი დახმარებით შევძელით, რომ კრიტიკული ორი თვის განმავლობაში გუნდის წევრები ანაზღაურების გარეშე არ დარჩნენ.  მსგავსი დამოკიდებულება და მხარდაჭერა გვაძლევს უდიდეს სტიმულს, რომ არ მოვდუნდეთ არცერთი წამით და ორიენტირებულნი მუდმივად განვითარებისკენ ვიყოთ.“ - აცხადებს კომპანიის გენერალური მენეჯერი.

ამჟამად Beard.ge-ს პროდუქციის 4 ძირითადი კატეგორია აქვს, რომელიც წვერისა და თმის მოვლას, სუნამოებს და წვერის პარსვა/შესწორებას მოიცავს. Beard.ge დაახლოებით 4 წლის წინ შეიქმნა და მამაკაცებს ცნობილი ბრენდების პროდუქციასთან ერთად ქართული წარმოების თავის მოვლის საშუალებებსაც სთავაზობს. თავდაპირველად კომპანია ბაზარზე ონლაინ გაყიდვების სახით გამოჩნდა, დღეისთვის კი მათი პროდუქციის შეძენა Beard.ge-ს 4 ფილიალში შეგიძლიათ : Galleria Tbilisi, City Mall Saburtalo, East Point, Tbilisi Mall. აღსანიშნავია, რომ საერთო გაყიდვებში ონლაინ შეკვეთები 15%-ს შეადგენს და კომპანია მოგებაზე მუშაობს, თუმცა პროდუქციის ფართო ასორტიმენტიდან გამომდინარე მუდმივ ინვესტიციას ახორციელებენ.

ანი ცარციძე