კემბრიჯის უნივერსიტეტის მკვლევარებმა გამოთვალეს, რომ ბიტკოინების წლიურ მაინიგზე მეტი ელექტროენერგია იხარჯება ვიდრე, მაგალითად არგენტინა მოიხმარს, საკმაოდ დიდი ქვეყანა, რომლის მოსახლეობაც 45 მილიონს აჭარბებს.
საყოველთაოდ ცნობილია, რომ კრიპტოვალუტების მოპოვება კომპიუტერების აქტიურ მუშაობას მოითხოვს და ამ პროცესში, ძალიან ბევრი ელექტროენერგია იხარჯება. „ძალიან ბევრი“ - ეს წელწადში 121,1 ტერავატი საათია და ეს, მხოლოდ ბიტკოინის მოპოვებას ეხება. სხვა კრიპტოვალუტები, ცალკე თემაა.
სავარაუდოდ, ეს მაჩვენებელი არ შემცირდება თუ, რა თქმა უნდა, თავად ბიტკოინი არ ჩამოიშალა, რისი ალბათობაც დღევანდელ რეალობაში საკმაოდ დაბალია.
ბიტკოინის სასარგებლოდ ბევრი ფაქტორი მოქმედებს, მაგალითად ის, რომ Tesla-მ მთავარ კრიპტოვალუტაში 1,5 მლრდ. დოლარი ჩადო და მომავალში კრიპტოვალუტით ანგარიშსწორებასაც დაუშვეს.
მთავარი კრიპტოვალუტის გაძვირება მაინერებს ქსელებში სულ უფრო მეტი კომპიუტერის ჩართვისკენ უბიძგებს, რაც, თავის მხრივ, ენერგომოხმარებას კიდევ უფრო ზრდის. კრიპტოვალუტის რაოდენობის ზრდასთან ერთად, მისი მოპოვების ალგორითმი სულ უფრო და უფრო რთული ხდება, რაც ასევე მაინინგს აძვირებს.
ამ დროისთვის მოპოვებულია 18, 5 მლნ. ბიტკონი.
„ვირტუალური ვალუტა თავისი არსით ანტიეკონომიკურია“ - ამბობს წიგნის „50-ფუტიანი ბლოკჩეინის თავდასხმა“-ს (Attack of the 50 Foot Blockchain) ავტორი დევიდ ჯერარდი.
მისი თქმით, მაინინგისთვის უფრო ეკონომიური აპარატურის გამოყენება გამოსავალი არაა, რადგანაც მოპოვებისთვის საჭირო ამოცანები სულ უფრო და უფრო რთულდება და ამ პროცესის შეჩერება შეუძლებელია. ამიტომაც, კრიპტოფერმების ენერგოდანახარჯები და ამავე დროს ატმოსფეროში მავნე ნივთიერებების გამოყოფა, ყველა შემთვევაში გაიზრდება.
„ყველაზე ცუდი კი ის არის, რომ ამხელა ენერგია ფაქტიურად ტყუილად, არაფერში, ჰაერში იხარჯება“ - მიიჩნევს ჯერარდი.
მისი თქმის, განსაკუთრებით აღმაშფოთებელია ბიტკოინის მხარდაჭერა ილონ მასკის და Tesla-ს მხრიდან.
„მასკმა სუფთა ენერგიის განვითარების საქმეში თავის წვლილს ხაზი ერთი ხელის მოსმით გადაუსვა და ეს ფული შემდეგ ბიტკოინებზე დახარჯა, რომლებიც ნახშირის წვით გამომუშავებული ენერგიით მოიპოვება. ალბათ დროა Tesla-ს სუბსიდირების საკითხი გადაიხედოს“ - მიიჩნევს დევიდ ჯერარდი.
მისი თქმით, აუცილებელია კრიპტოვალუტის მოპოვებაზე ეკოლოგიური გადასახადის შემოღება, რაც მისი მოპოვებისთვის საჭირო ენერგომოხმარებისგან მიყენებულ ზარალს ნაწილობრივ მაინც აანაზღაურებს.