სამხრეთ გერმანიაში, ბავარიის რეგიონში მაისის განმავლობაში სუპერმარკეტებს, ლუდის ბარებსა და რესტორნებს გახსნიან. ამის შესახებ Reuters-ი წერს.
როგორც ოფიციალური წყაროები იუწყებიან, შეზღუდვების მოხსნის მიზეზი ტურიზმის განვითარებაა. შეზღუდვების მოხსნის შემდეგ სავალდებულო იქნება ის რეკომენდაციები, რომელიც კორონავირუსის გავრცელების პრევენციას შეუწყობს ხელს.
აღსანიშნავია,რომ ბავარიის რეგიონში 4 მაისიდან რელიგიური მსახურების ჩატარება გარკვეული პირობების დაცვით ნებადართული გახდა. როგორც ბავარიის ხელისუფლებაში აღნიშნეს, რელიგიურ ობიექტებში სოციალური დისტანცირებისა და პირბადეების ტარების წესი უნდა შესრულდეს. ასევე, დაწესებული იქნება რელიგიურ ობიექტში ყოფნის დრლოის ლიმიტი, რაც 60 წუთს შეადგენს.
ბოლო მონაცემებით, გერმენიაში კოვიდინფიცირების 166 ათასი შემთხვევაა აღრიცხული, გამოჯანმრთელდა 128 ათასი პაციენტი, 6 993 კი გარდაიცვალა.
მსოფლიოში კორონავირუსით გარდაცვლილთა რაოდენობა 250 ათასს გადაცდა. ამის შესახებ ჯონს ჰოპკინსის უნივერსიტეტის მიერ გამოქვეყნებული სტატისტიკური მონაცემები მეტყველებს.
ბოლო მონაცემებით, პანდემიის დაწყებიდან დღმდე მსოფლიოში კორონავირუსს 250 134 ადამიანი ემსხვერპლა. მსოფლიოში კორონავირუსით 3 571 615 ადამიანი დაინფიცირდა, ხოლო 1 145 407 კი გამოჯანმრთელდა. პანდემიას მსოფლიოში ყველაზე ბევრი ადამიანი აშშ-ში (68.4 ათასი) ემსხვერპლა. მეორე ადგილზეა იტალია (29 ათასი), მესამეზე კი - დიდი ბრიტანეთი (28.8 ათასი).
IMEDINEWS.GE