ბათუმის საქალაქო სასამართლომ პატიმრობა მიუსაჯა სამივე კაცს, რომელიც ამავე ქალაქში მრავალსართულიანი კორპუსის ჩამონგრევის საქმეზე იყო დაკავებული. გადაწყვეტილება დღეს, 5 ივლისს გამოცხადდა.
26 მაისის ქუჩაზე მდებარე 8 სართულიანი სახლის სადარბაზოს ჩამონგრევის საქმეზე დაკავებულთაგან:
ზაურ ბუდაღოვს, პირველ სართულზე ბინის მფლობელს, ვის სახლშიც სარემონტო სამუშაოები მიმდინარეობდა 4-წლიანი პატიმრობა მიესაჯა;
ამ სახლში სარემონტო სამუშაოებში ჩართულ ჰუსეინ და გიორგი სურმანიძეებს კი სამ-სამი წლით თავისუფლების აღკვეთა.
ბათუმში 26 მაისის ქუჩაზე 8 სართულიანი საცხოვრებელი სახლის ნაწილი 2021 წლის 8 ოქტომბერს ჩამოინგრა. ნანგრევებში დაიღუპა 9 ადამიანი, მათ შორის 3 ბავშვი. მხოლოდ 1 ადამიანის გადარჩენა მოხერხდა.
გამოძიება მაშინვე დაიწყო სისხლის სამართლის კოდექსის 240-ე მუხლის მეორე ნაწილით, რომლითაც სისხლის სამართლის პასუხისმგებლობა სამშენებლო სამუშაოების დროს უსაფრთხოების წესების დარღვევისთვის დგება. პატიმრობამისჯილი სამივე კაცი მეორე დღეს, 9 ოქტომბერს დააკავეს.