სპეციალისტები სწავლობენ, არის თუ არა უსაფრთხო ცხოვრება ბათუმში, იმ ადგილის მიმდებარედ, სადაც, ერთი კვირის წინ, კორპუსი ჩამოინგრა.

შენობების მდგრადობას ექსპერტთა ჯგუფი სწავლობს. საუბარია ორ კორპუსზე, საიდანაც ერთი სადარბაზო, ამ დრომდე, სრულად არის დაცლილი.

„ჩატარდა 26 მაისის 13 ნომერში მდებარე კორპუსის ექსპერტიზა, რომლის შედეგადაც, დადგინდა, რომ შენობა აღდგენას არ ექვემდებარება და საჭიროა ამ შენობის დემონტაჟი, სპეციალურად შემუშავებული პროექტის მიხედვით. დღეს განმეორებით ჩამოვიდნენ ექსპერტები სამხარაულის ექსპერტიზის ბიუროდან და მიმდინარეობს მემედ აბაშიძისა და კლდიაშვილის ქუჩებზე მდგომი კორპუსების ექსპერტიზა. მიღებულია გადაწყვეტილება, რომ აშენდეს იგივე პარამეტრების კორპუსი და ყველა ოჯახი, რომელიც აქ ცხოვრობდა, ბინით დაკმაყოფილდება“, - ამბობს ბათუმის მერის მოვალეობის შემსრულებელი ლელა სურმანიძე.

ბათუმში, 26 მაისის ქუჩაზე, 13 ნომერი კორპუსის ერთი სადარბაზო 8 ოქტომბერს, დაახლოებით, 12:00 საათზე ჩამოინგრა. შემთხვევას 9 ადამიანის სიცოცხლე ემსხვერპლა, მათ შორის - 3 ბავშვი. ერთი ადამიანი ამ დრომდე ექიმების მეთვალყურეობის ქვეშ რჩება - ზვიად თავდგირიძე ერთადერთია, რომელიც ნგრევის დროს კორპუსში იყო და გადარჩა. ის ხელოვნური ვენტილაციიდან მოიხსნა და დადებითი დინამიკა აქვს.

საცხოვრებელი კორპუსის ნგრევის ფაქტზე მიმდინარე გამოძიების ფარგლებში 3 ადამიანი დააკავეს. გამოძიება საქართველოს სსკ-ის 240-ე მუხლის მე-2 ნაწილით და 187-ე მუხლის მე-3 ნაწილით მიმდინარეობს. დანაშაულები 2-დან 10 წლამდე ვადით თავისუფლების აღკვეთას ითვალისწინებს.

imedinews.ge