ბათუმის შემოვლითი გზის მშენებლობაზე არსებული პრობლემები გადაჭრილია და სამშენებლო სამუშაოები განახლდა. აღნიშნულის შესახებ ინფორმაციას აჭარის მთავრობა ავრცელებს. როგორც „კომერსანტს“ საავტომობილო გზების დეპარტამენტში უთხრეს, ბათუმის შემოვლითი გზის მშენებლობა 2023 წელს უნდა დასრულდეს.

დეპარტამენტში კონკრეტული თვე არ დაუზუსტებიათ, თუმცა როგორც ცნობილია, ავტომაგისტრალის მშენებლობის დაწყებიდან დღემდე პროექტის დასრულები ვადები რამდენჯერმე შეიცვალა.

3 გვირაბის და 14 ხიდის მშენებლობა უკვე დასრულებულია, დანარჩენ 2 გვირაბზე ბურღვა-აფეთქების სამუშაოები მიმდინარეობს; ასევე გრძელდება დარჩენილი ხიდების სამშენებლო სამუშაოები.

ბათუმის შემოვლითი გზის პროექტის ფარგლებში, 14 კმ-იანი 2 ზოლიანი ასფალტ-ბეტონის გზა, 20 სახიდე გადასასვლელი და 5 გვირაბი შენდება.

ახალი შემოვლითი გზა გაივლის: მახინჯაურს, განთიადს, კაპრეშუმს, სალიბაურს, ფერიას, მახვილაურსა და ხელვაჩაურს.

ამჟამად არსებული გზა ტურისტულ და საცხოვრებელ ზონაში გადის, რაც ართულებს საერთაშორისო სატრანზიტო ტრანსპორტის მიმოსვლას.

პროექტის განხორციელების შედეგად, ბათუმის შემოვლითი გზა (ქობულეთის შემოვლით გზასთან ერთად) სრულად განტვირთავს მოძრაობას აჭარის საკურორტო ზონაში, რაც ხელს შეუწყობს სატრანზიტო ტვირთბრუნვის გაზრდას.

პროექტი აზიის განვითარების ბანკისა (ADB) და აზიის ინფრასტრუქტურის საინვესტიციო ბანკის (AIIB) მიერ ფინანსდება.

როგორც „ბათუმელები“ წერს, ბათუმის შემოვლითი გზის მშენებლობაზე ხელშეკრულება 2017 წელს გაფორმდა. ამ 14-კილომეტრიანი გზის მშენებლობის დასრულება 2020 წელშიც იგეგმებოდა, თუმცა სამუშაოების შეფერხების მიზეზად, ოფიციალურად, პანდემია დასახელდა.

პროექტის სახელშეკრულებო ღირებულება 329 630 734 ლარია.

გზას თურქული კომპანია „POLAT YOL & MAPA“ აშენებს.