ბათუმის ინდუსტრიულ ზონაში ამ დროისთვის 28 საინვესტიციო პროექტი მიმდინარეობს, რომელთა რაოდენობაც სამომავლოდ კიდევ უფრო გაიზრდება, რადგანაც აჭარის ფინანსთა და ეკონომიკის სამინისტრო ზონიდან აუქციონზე კიდევ რამდენიმე მიწის ნაკვეთის გამოტანას აპირებს. მთლიანობაში ბათუმის ინდუსტრიული ზონა 90 ჰა მიწის ნაკვეთზე საწარმოების მოწყობას ითვალისწინებს.
აჭარის ფინანსთა და ეკონომიკის მინისტრი ჯაბა ფუტკარაძე ამბობს, რომ ეკონომიკური გათვლების მიხედვით, მოსალოდნელია 75 მლნ დოლარის კერძო ინვესტიცია, რითაც დაახლოებით 1500 სამუშაო ადგილი შეიქმნება.
„ახალი ინდუსტრიული ზონის განვითარება არის ერთ-ერთი უმნიშვნელოვანესი და მასშტაბური პროექტი, რომელსაც აჭარის მთავრობა ცენტრალურ ხელისუფლებასთან ერთად ახორციელებს. ამ პროექტის დასრულების შედეგად მობილიზებული იქნება ახალი ინვესტიციები, შეიქმნება ახალი სამუშაო ადგილები, აშენდება საწარმო-გადამამუშავებლები.
საერთო ჯამში პროექტის შედეგად 75 მლნ დოლარის ინვესტიციის განხორციელება და 1500-ზე მეტი სამუშაო ადგილის შექმნა იგეგმება. ამავდროულად, ბათუმის მუნიციპალიტეტი 14 მლნ ლარის ღირებულების ინფრასტრუქტურის რეაბილიტაციის პროექტს ახორციელებს. პროექტის ფარგლებში იგეგმება სანიაღვრე არხების და სხვადასხვა ინფრასტრუქტურის მოწყობა. პარალელურად აჭარის ფინანსთა და ეკონომიკის სამინისტრო აბსოლიტურად გამჭვირვალედ ახორციელებს მიწის ნაკვეთების პრივატიზებას. დღეის მდგომარეობით 28 მიწის ნაკვეთია პრივატიზებული. შესაბამისად 28 პროექტი აქტიურ ფაზაშია. ჩვენი მოლოდინია, რომ ეს პროექტი უზრუნველყოფს და მნიშვნელოვნად შეუწყობს ხელს ეკონომიკურ აქტივობას აჭარაში“, - აცხადებს ჯაბა ფუტკარაძე.
რაც შეეხება ბიზნესს, კერძო სექტორი ამბობს, რომ გადატვირთული ბათუმის და ინდუსტრიული ზონის ხელსაყრელი მდებარეობის გამო ბათუმის ინდუსტრიულ ზონაში შესვლა მათი შემდგომი გაფართოებისთვის მნიშვნელოვანი ფაქტორია.
კომპანია „აღმშენებლობაში“, რომელიც აჭარაში სამშენებლო და სარემონტო მასალების ერთ-ერთი უმსხვილესი მიმწოდებელია, აცხადებენ, რომ ბათუმის ინდუსტრიულმა ზონამ მათ კიდევ უფრო გაფართოების და ბიზნესის ზრდის შესაძლებლობა მისცა.
„კომპანია სამშენებლო და სარემონტო მასალების რეალიზაციის ბაზარზე წლებია ოპერირებს, თუმცა როდესაც გამოცხადდა აუქციონი ბათუმის ინდუსტრიულ ზონაში მიწების პრივატიზებაზე, იმდენად კარგი პირობები იყო ეტაპობრივი გადახდის საფუძველზე, რომ გადავწყვიტეთ გაფართოება. ბათუმი დღეს საკმაოდ გადატვირთულია, სამრეწველო ზონად მას უკვე ვეღარ იყენებ. ბათუმის ინდუსტრიული ზონას კი საკმაოდ ხელსაყრელი მდებარეობა აქვს, რადგანაც ის განთავსებულია აეროპორტთან ახლოს, გეზ-თან ახლოს და ასე შემდეგ.
ამ ეტაპზე ვაშენებთ სასაწყობე მეურნეობას. პარალელურად ვიკვლევთ ბაზარს, გვინდა კიდევ უფრო წინ წავიდეთ, განვითარდეთ და ჩვენი საწარმო შევქმნათ. ბაზრის კვლევის დასრულების შემდეგ მივიღებთ გადაწყვეტილებას რა მიმართულებით გავფართოვდეთ და კონკრეტულად რა ტიპის საწარმო ავაშენოთ.
გვინდა, რომ ოქტომბრის დასაწყისისთვის უკვე ჩამოყალიბებულები ვიყოთ რა მიმართულებით მივდივართ, რადგანაც ფართი გვაძლევს იმის საშუალებას, რომ სასაწყობე მეურნეობასთან ერთად წარმოებაც დავიწყოთ“, - აცხადებს კომპანიის “აღმშენებლობის“ წარმომადგენელი თეა გიორგაძე.
კომპანია დღეს სამშენებლო და სარემონტო საშუალების რეალიზებითაა დაკავებული და ადგილობრივი წარმოების სამშენებლო და სარემონტო მასალების რეალიზების გარდა პროდუქცია შემოაქვს თურქეთიდან, ჩინეთიდან და ომამდე შემოჰქონდა უკრაინიდანაც.
საწარმოს მშენებლობას და მის გახსნას, არსებული საპრივატიზაციო პირობების მიხედვით „აღმშენებლობა“ 2023 წლის ბოლომდე დაასრულებს. კომპანიას ინდუსტრიულ ზონაში სულ 7012 კვ/მ მიწის ფართობი ეკუთვნის, საიდანაც 3000 კვ/მ-ზე სასაწყობე მეურნეობას განალაგებს.