სამშენებლო დეველოპერული კომპანია Avangard-ი ბათუმის ცენტრში მრავალფუნქციურ საცხოვრებელ და საინვესტიციო კომპლექსს აშენებს. პროექტის საინვესტიციო მოცულობა 2 მილიონი ლარია.
როგორც პროექტის გაყიდვების მწარმოებელ კომპანია REA INVESTMENT- ში განმარტავენ, საცხოვრებელ კომპლექსში განთავსდება ასევე ფიტნეს დარბაზი, თუმცა უცნობია რომელ მსხვილ ბრენდთან მიმდინარეობს მოლაპარაკება.
„პროექტი შენდება ახალი ბულვარის ბოლოში, კორპუსი იქნება 10 სართულიანი. პირველ სართულზე იქნება კომერციული ფართი, სადაც იქნება კაფე და სუპერმარკეტი, მეცხრე და მეათე სართული იქნება დუპლექსი, განთავსდება გამაჯანსაღებელი სივრცე, ფიტნეს ცენტრი და საბილიარდე . საცხოვრებელი ბინების ფართები მერყეობს 29 კვადრატიდან - 71 კვადრატამდე. ჯერჯერობით არ არის შემუშავებული, თუ რა ბრენდის ფიტნეს დარბაზი გაიხსნება, თუმცა რა თქმა უნდა იქნება ბრენდირებული,“ - განმარტავენ კომპანიაში.
10-სართულიანი საცხოვრებელი კომპლექსი მოიცავს ღია ტერასას, ლაუნჯს ტერასაზე, ასევე პროექტში შედის ბარი და გასართობი სივრცე, ღია და მიწისქვეშა ავტოპარკინგი, ველოპარკინგი, სავაჭრო ცენტრი, სავარჯიშო დარბაზი - ფიტნეს ცენტრი, რეკრეაციული ზონა 500 კვ-მზე, ასევე შენობაში გაიხსნება გამაჯანსაღებელი ცენტრი „ავანგარდი. “
პროექტის მშენებლობა უკვე დაწყებულია, ამ ეტაპზე მიმდინარეობს ფუნდამენტის მოსამზადებელი სამუშაოები. პროექტის დასრულების ვადაა 2021 წლის ნოემბერი.
მარიამ მორგოშია
ბათუმი
