ბათუმში „სილქ როუდ ჯგუფის“ საკუთრებაში არსებული 6 ჰექტარი მიწის ფართობზე მულტიფუნქციური კომპლექსის „ბათუმი რივიერას“ მშენებლობა იგეგმება, თუმცა პანდემიის გამო პროექტი თვეების განმავლობაში დაპაუზებულია.

„პანდემიის გამო ბათუმი რივიერას მშენებლობა უკვე თვეებია დაპაუზებულია, სიტუაციის განმუხტვას ველოდებით, ასევე ტურიზმის გახსნას, ამიტომ ამ ეტაპზე სამშენებლო სამუშაოები არ მიმდინარეობს. სატესტო ხიმინჯები გავაკეთეთ და ამის შემდეგ შეჩერება მოგვიწია. მშენებლობის განახლება მომავალ წლამდე არ იგეგმება, სავარაუდოდ 2022 წლის დასაწყისში გავაგრძელებთ. რაც შეეხება პროექტს, სხვა მხრივ ამ ეტაპზე ყველაფერი უცვლელია“, - ამის შესახებ „კომერსანტს“ კომპანია „ბათუმი რივიერას“ დირექტორმა გოგა კაპანაძემ განუცხადა.

„ბათუმი რივიერას“ პროექტი სახელმწიფოს საკუთრებაში არსებულ 2 ჰექტარზე პარკის განაშენიანებასაც მოიცავს, რომელიც სახელმწიფოს საკუთრებაშივე დარჩება. ტერიტორია გახდება ბულვარის შემადგენელი ნაწილი და შეუნარჩუნდება რეკრეაციული ზონის სტატუსი. „სილქ როუდ ჯგუფი“ მხოლოდ მის ლანშაფტურ დიზაინს შექმნის. ასევე, პროექტის ნაწილად მოიაზრება 20-წლიანი იჯარით აღებული იახტკლუბის ტერიტორია. საწყის ეტაპზე, იახტ კლუბში 3 მილიონი აშშ დოლარის ინვესტირება იგეგმება, რომელსაც „ბათუმის იახტ კლუბი“ და „სილქ როუდ ჯგუფი“ თანაბრად გაინაწილებენ.

პროექტის თანახმად, ასევე დაგეგმილია საცხოვრებელი და სასტუმრო კომპლექსების მშენებლობა, კეთილმოწყობილი პარკის, განსხვავებული კონცეფციის კაზინოს, 2000 სტუმარზე გათვლილი მულტიფუნქციური კონგრეს ცენტრის მშენებლობა, სადაც შესაძლებელი იქნება სპორტული შეჯიბრებების, კონცერტების, გამოფენების და სხვა ღონისძიებების მოწყობა. იგეგმება კაფეების, რესტორნების და სხვადასხვა ტიპის დაწესებულებების მოწყობაც.

როგორც ცნობილია, „სილქ როუდ ჯგუფმა“ „ბათუმი რივიერის“ პროექტის არქიტექტურულ დიზაინსა და ურბანულ დაგეგმარებაზე ისეთ წამყვან კომპანიასთან იმუშავა, როგორიც არის Chapman Taylor. პროექტის კონცეფცია და იერსახე „სილქ როუდ ჯგუფისთვის“ თავიდანვე მნიშვნელოვანი ეტაპი იყო. სწორედ ამიტომ ჩატარდა ტენდერი, რომელშიც 25-მა საერთაშორისო კომპანიამ მიიღო მონაწილეობა. შედეგად, სამუშაოს შესრულება Chapman Taylor-ს დაევალა.

პროექტი რამდენიმეეტაპიანი იქნება და მისი სრულად დასრულება 5 წელიწადში იგეგმებოდა, თუმცა კომპანიის წარმომადგენლის განცხადებით, მშენებლობის გაჭიანურების გამო შესაძლოა დასრულების თარიღი და ვადებიც შეიცვალოს.

ნინო თამაზაშვილი