წარმოშობით კახელი ფერმერი შოთა ერიაშვილი წელს 45-50 ტონა ბატატის (ტკბილი კარტოფილი) მოსავალს ელოდება. განათლებით ბიოლოგი შოთა ერიაშვილი საქართველოში პირველი და ერთადერთი ბატატის მწარმოებელია, რომელიც თითქმის 5 წელია ამ კულტურის განვითარებითაა დაკავებული და პირველი კომერციული მოსავალი 2018 წელს აიღო.
ფერმერს ბატატის მოყვანის იდეა მას შემდეგ გაუჩნდა, რაც აღმოაჩინა, რომ ქართულ ჰიპერმარკეტებში მხოლოდ იმპორტირებული ტკბილი კარტოფილი იყიდებოდა და ისიც 1 კგ. დაახლოებით 12 ლარი ღირდა.
გასაყიდად ტკბილი კარტოფილი ფერმერს ჰიპერმარკეტების ქსელ „აგროჰაბში“ შეაქვს. ასევე, მცირე რაოდენობით თბილისის პატარა სასურსათო მაღაზიებშიც იყიდება. შოთა ერიაშვილმა აღნიშნა, რომ „აგროჰაბს“ წელსაც სრული მოსავლის შეძენა სურდა, თუმცა სეზონზე ჰიპერმარკეტს 15-20 ტონაზე მეტის რეალიზაცია არ შეუძლია, შესაბამისად ფერმერი ისეთი სუპერმარკეტების ათვისებასაც გეგმავს, როგორებიცაა „ნიკორა“ და „გუდვილი“.
ვიტამინებით, ცილებით და სხვა სასარგებლო თვისებებით გაჯერებულ ამ ბოსტნეულს დაბალი გლიკემიური მაჩვენებელი აქვს, რაც დიაბეტით დაავადებულებისთვისაც მისაღებია.
„როგორც კი გავარკვიე, რომ ქართულ ბაზარზე მხოლოდ იმპორტირებული ბატატი იყიდებოდა და მას ადგილობრივები არ აწარმოებდნენ, მისი თავად მოყვანის იდეა დამებადა. ჩემი შვილის დახმარებით საერთაშორისო გაყიდვების საიტიდან ბატატის ღეროები გამოვწერე, თუმცა ტრანსპორტირებისას, ტემპერატურული შეუსაბამობის გამო გაფუჭდა და ბოლოს უკრაინიდან ჩამოვიტანეთ 14 ბატატის ღერო. აქედან 11 გადარჩადა და 0.5 ტონა მოსავალი ავიღეთ. ამის შემდეგ, ყოველწლიურად, უფრო და უფრო მეტ ბატატს ვაწარმოებთ“, - განმარტავს შოთა ერიაშვილი.
საერთო ჯამში, ფერმერს 6 სახეობის ბატატი მოჰყავს, მათ შორის ამერიკასა და სხვა რიგ ქვეყნებში ყველაზე პოპულარული Beauregard-ი. შოთა არიაშვილის ინფორმაციით, კახეთი ბატატის მოყვანისთვის შესაფერისი ადგილია, მთავარი ნაკვეთის სწორად შერჩევაა.
„ბატატს უყვარს სითბო და არ მოსწონს თიხის ნიადაგი. მიწა უნდა იყოს მსუბუქი და მყიფე, რათა ბოლქვები კარგად და თანაბრად განვითარდეს. ამ შემთხვევაში წვიმა უკვე აღარ წარმოადგენს საშიშროებას. თუ თქვენ დასეტყვილ ფოთლებს მოაშორებთ და მხოლოდ ღეროს დატოვებთ, პრობლემა არც სეტყვა იქნება. რამდენიმე დღეში კი ახალი ფოთლები ამოუვა.
ჩვენ ეკოლოგიურად სუფთა და გემრიელი ბატატი გვაქვს. არ ვიყენებ მავნე ქიმიურ დანამატებს. გასაყიდად გატანამდე თითოეული მოსავლის ჯგუფიდან ნიმუშებს ვიღებთ და ლაბორატორიაში ხარისხზე ვამოწმებთ“, - განმარტავს ერიაშვილი.
ბატატის მწარმოებელი ფერმერი ქართულ ბაზარზე უკონკურენტოა. მისი თქმით მოსალდნელია სხვა ადგილობრივმა ფერმერებმაც დაიწყონ ტკბილი კარტოფილის მოყვანა, თუმცა ახლო მომავალში - არა, რადგან მათ შესაბამისი რესურსები არ გააჩნიათ.
ამ დროისთვის შოთა ერიაშვილს ნაქირავები 2 ჰა მიწიდან 1.5 ჰა ათვისებული აქვს და სამომავლოდ საკუთარი მიწის შეძენას, წარმოების გაფართოებას და სხვა არატრადიციული ბოსტნეულისა თუ ხილის მოყვანას გეგმავს. გარდა ამისა, სომხეთსა და აზერბაიჯანსი ბატატის ექსპორტზე გატანა სურს.
წყარო east-fruit.com
მოამზადა ანი ცარციძემ