ბასკური კულინარიის ცენტრი, რომელიც ესპანეთის ყველაზე სიმბოლური გასტრონომიური სკოლაა, საქართველოში კულინარიის სასწავლო ცენტრს ხსნის. ამის შესახებ ესპანური საინფორმაციო სააგენტო EFE წერს.

ახალი სკოლა, რომელიც კავკასიის უნივერსიტეტის შემადგენლობაში შევა, გურჯაანში განთავსდება, უთხრა EFE–ს საქართველოს განათლების მინისტრის მოადგილემ თამარ ქიტიაშვილმა.

„საქართველოში ამ სკოლის გახსნა ჩვენი ქვეყნის ტურისტული პოტენციალის მეტად ათვისებას შეუწყობს ხელს და მის პოპულარობას გაზრდის. ჩვენი სამინისტრო ამ პროექტს ყოველმხრივ დაუჭერს მხარს“, – თქვა ქიტიაშვილმა ბასკური კულინაარიის ცენტრის წარმომადგენლებთან შეხვედრის შემდეგ.

მისივე თქმით, საქართველოში გასტრონომიული ტურიზმი „აქტიურად ვითარდება“ და კორონავირუსის პანდემიის დასრულების შემდეგ ახალი ბუმის მოლოდინიც არსებობს.

მინისტრის მოადგილემ აღნიშნა, რომ „მსოფლიოში სახელგანთქმულ ესპანურ კულინარიულ ცენტრთან თანამშრომლობა საქართველოსთვის, ქართველი და უცხოელი სტუდენტებისთვის, რომლებიც ამ სკოლაში სწავლებას შეძლებენ, განსაკუთრებული მნიშვნელობისაა“.

გურჯაანში სკოლის მშენებლობა მიმდინარე წელს იწყება და სასწავლებელი მზარეულების პირველ ნაკადს 2023 წელს გამოუშვებს.

„გეგმის თანახმად, სკოლაში ყოველწლიურად 200 სპეციალისტი ისწავლის“, – თქვა ქიტიაშვილმა.

ქართული დელეგაცია სან–სებასტიანს ივლისში ეწვევა. ვიზიტის მიზანია ახალი სკოლისთვის სასწავლო პროგრამების შერჩევა და ბასკ პედაგოგებთან ხელშეკრულებების გაფორმება.