„ბარბერ შოფი“ სალონი რომელიც სპეციალურად მამაკაცებისთვისისაა, კორონავირუსის გამო დაწესებული რეგულაციების გამო ბაზარს, გაზრდილი ფასით დაუბრუნდა,“-ამის შესახებ „კომერსანტს“ სალონის ერთ-ერთმა დამფუძნებელმა თამარ დამენიამ განუცხადა.
სალონებმა პანდემიის შემდეგ მუშაობა ახალი პირობებით განაახლეს, რომელიც ერთი მხრივ საზოგადოების უსაფრთხოებისთვისაა აუცილებელი, თუმცა მეორე მხრივ მომსახურების ფასს აძვირებს.
თამარ დამენიას თქმით, გაზრდილი ფასები ეროვნული ვალუტის არასტაბილურმა მდგომარეობამ განაპირობა. მისი თქმით დიდი ხანია გეგმავენ გაფართოებას და ახალი ფილიალის გახსნას, თუმცა ეს გეგმა დიდი ხნით გადავადდა.
„ის ერთი ფილიალი რომელიც გვაქვს რეგულაციების შესაბამისად გავხსენით, გავითვალისწინეთ ყველა ნორმა, რომელიც ჯანდაცვის ორგანიზაციამ დააწესა. რეგულაციებმა ნამდვილად გამოიწვია მომსახურების ფასის გაზრდა და ფასების გაზრდა ჩვენც მოგვიწია.
სურვილი გვქონდა კიდევ ერთი ფილიალი გაგვეხსნა, თუმცა გადავდეთ. ლარის კურსისა და ზოგადად ქვეყანაში გაზდილი ფასების გამო ვერ მოვახერხებთ დამატებითი სალონის ამუშავებას. რაც შეეხება სალონის მუშაობას, საკმაოდ აქტიურად ვმუშაობთ გახსნის დღიდან, პირველ დღეებში უამრავი ადამიანი მოვიდა, ისე რომ საკმაოდ დიდი რიგი გვქონდა, ახლა კი ჩვეულებრივად როგორც ადრე, ისევ ისეთი სიხშირით ვიღებთ მსურველებს,“-აცხადებს თამარ დამენია.
„ბარბერ შოფის“ დამფუძნებელმა რეგულაციების აუცილებლობასა და სალონის ფინანსურ ზარალზეც ისაუბრა.
„არ გვიჭირს იმ წესების დაცვა რომელსაც რეგულაცია ითვალისწინებს, რადგან ვიაზრებთ რომ თითოელური ჩვენგანის სიცოცხლისთვის მნიშვნელოვანია გადადგმული ნაბიჯი, ეს არ არის სახელმწიფოს კაპრიზი და უნდა მივუდგეთ, როგორც დაცვის უმაღლეს მექანიზმს.
რაც შეეხება ფინანსურ ზარალს, რომელიც ამ პერიოდში მოგვადგა საკმაოდ დიდია, ზუსტ რიცხვზე ვერ ვისაუბრებთ, მაგრამ სალონი ისეთი სფეროა სადაც ყოველდღიურ შემოსავალზე ვართ დამოკიდებული, ჩვენ კი 2 თვე შემოსავლის გარეშე ვიყავით,“აღნიშნა დამენიამ.
შეგახსენებთ, რომ „ბარბერ შოფი“ თბილისში მამაკაცებისთვის პირველი სალონია, რომელიც 2016 წლიდან ფუნქციონირებს. კომპანიის დამფუძნებლის განცხადებით, საქართველოში სალონები ძირითადად ქალბატონებისთვისაა განკუთვნილი და მამაკაცების სალონების ნიშა ასათვისებელია და ახალი ფილიალების გახსნასაც ფიქრობდნენ, თუმცა დამატებითი ფილიალის გახსნა დროებით გადაიდო.
ნათია ლომიძე
ბარბერ შოფი
