აშშ-ის ყოფილმა პრეზიდენტმა, ბარაკ ობამამ განაცხადა, რომ დონალდ ტრამპს რეალობის უარყოფა არ გამოუვა, ხოლო არჩევნებში დამარცხების აღიარებაზე უარის თქმა ქვეყნისთვის ზიანის მომტანი შეიძლება იყოს.

„ის, რომ პრეზიდენტს არ სურს ხელისუფლების გადაბარების კუთხით თანამშრომლობა, იმას ცხადყოფს, თუ როგორ ზიანს აყენებს იგი ძირითად დემოკრატიულ ნორმებს“, - განაცხადა ბარაკ ობამამ.

აშშ-ის 44-ე პრეზიდენტმა ასევე აღნიშნა, რომ „რესპუბლიკელების“ ლიდერებმა უფრო მკაფიოდ უნდა დააფიქსირონ საკუთარი პოზიცია შექმნილ ვითარებასთან დაკავშირებით.

„პანდემიის პერიოდში ვართ. ეკონომიკური კრიზისია. ეროვნული უსაფრთხოების კუთხით სერიოზული პრობლემების წინაშე ვდგავართ. იმ დროს, რაც ხელისუფლების გადაბარებაზე იკარგება, თავისი შედეგები მოჰყვება“, - დასძინა ბარაკ ობამამ.

15 ნოემბერს აშშ-ის პრეზიდენტმა, დონალდ ტრამპმა განაცხადა, რომ ჯო ბაიდენი მხოლოდ „ფეიკ ნიუს“ მედიის თვალებშია გამარჯვებული.

„მან მხოლოდ „ფეიკ ნიუს“ მედიის თვალებში გაიმარჯვა. არაფერს ვთმობ! წინ გრძელი გზა გვაქვს გასავლელი. ეს გაყალბებული არჩევნები იყო!“ - დაწერა დონალდ ტრამპმა Twitter-ზე.

9 ნოემბერს დონალდ ტრამპის საარჩევნო შტაბის ხელმძღვანელმა, ბილ სტეპინმა აღნიშნა, რომ რამდენიმე გადამწყვეტ შტატში დონალდ ტრამპის გუნდი სამართლებრივ დავებს აწარმოებს არჩევნებში დაფიქსირებულ დარღვევებთან დაკავშირებით.

ამერიკული მედიის პროგნოზით, 3 ნოემბრის არჩევნები აშშ-ში ჯო ბაიდენმა მოიგო. მას ახლა კოლეგიაში 306 ხმა აქვს, რაც საჭირო ხმების რაოდენობას (270)აღემატება.

imedinews.ge