ბაქსვუდის სკოლას ორი ახალი კორპუსი შეემატება, 2021 წელს წყნეთის კამპუსის მშენებლობის დასრულება იგეგმება. ხოლო მარშალ გელოვანზე, ბაქსვუდის სკოლა m³-ს კომპლექსში 2022 წლისთვის დაიწყებს მოსწავლეების მიღებას. პროექტის შესრულების საინვესტიციო მოცულობა ორივე კამპუსის შემთხვევაში 22 მილიონი ლარია.

როგორც „კომერსანტს“ ბაქსვუდის სკოლის საზოგადოებასთან ურთიერთობისა და მარკეტინგის მენეჯერმა ნინო ფალავანდიშვილმა განუცხადა  წყნეთის კაპუსი 240 მოსწავლეზეა გათვლილი, ხოლო მეორე კამპუსი 960 მოსწავლეს მიიღებს.

„წყნეთის ახალი კამპუსი, რომელშიც სკოლის დაწყებითი საფეხური გადავა სრულად, გათვლილია 240 მოსწავლეზე. ხოლო პროექტი მარშალ გელოვანზე მოიაზრებს 960 მოსწავლეს საშუალო სკოლაში და დამატებით, საბავშვო ბაღსა და სკოლამდელი აღზრდის ცენტრში 240 აღსაზრდელს.

წყნეთის ახალ კამპუსში თემატური სასწავლო ოთახები (ხელოვნების, მომავლის პროფესიების, საბუნებისმეტყველო საგნების...) სრულად იქნება აღჭურვილი საჭირო ინვენტარით. ასევე, თანამედროვე სტანდარტებით მოეწყობა სპორტული დარბაზი. ფართობი დაახლოებით 3000 კვ.მ-ს მოიცავს.

რაც შეეხება კადრებს, იგეგმება არსებულ ბაზაზე ახალი თანამშრომლების გადამზადება და დატრენინგება.

ინფრასტრუქტურულად ბაქსვუდი ახალ ლოკაციაზე, რა თქმა უნდა, განსხვავებული იქნება, რადგან მისი კონცეფცია არსებულის იდენტური ვერ იქნება. სრულიად ახალი სივრცე და შესაძლებლობები ჩვენთვისაც დიდი გამოწვევაა, რაც ძალიან გვახარებს. ამასთან, ახალი გარემო საშუალებას გვაძლევს, დავნერგოთ სიახლეები, გავიზიაროთ თანამედროვე მოთხოვნები და სტანდარტები,“ - ამბობს ნინო ფალავანდიშვილი.

ახალი კამპუსების დაახლოებით 9000 კვ.მ-ზე იქნება განთავსებული. როგორც „ბაქსვუდში“ აღნიშნავენ, სწავლების ფასის ცვლილება არ იგეგმება, ახალი კამპუსების დამატება კი ბაზარზე გაზრდილმა მოთხოვნამ განაპირობა.

„მსოფლიოში შექმნილი ვითარება, ნამდვილად არ არის სახარბიელო, თუმცა განათლების სფერო თავის აქტუალობას მაინც არ კარგავს. ამ ეტაპისთვის მკვეთრ შემცირებას სექტორი არ განიცდის, რადგან განათლებაზე მოთხოვნის ცვლილება ნაკლებად ელასტიურია. თუმცა, ეკონომიკური კრიზისის პირობებში ვიაზრებთ და ვითვალისწინებთ ყველა შესაძლო შეფერხებას. პანდემიის დასრულების შემდეგ, როდესაც ეკონომიკა დაუბრუნდება თავის ნიშნულს, განათლება კვლავ წამოიწევს მოწინავე ხაზზე.

ვფიქრობთ, ხელმისაწვდომობა განათლების ინდუსტრიაში ერთ-ერთი საკვანძო საკითხია, სწორედ ამიტომ, საფასო სეგმენტის ცვლილება არ იგეგმება და ღირებულება უცვლელი დარჩება.

წყნეთის ბაქსვუდის გაფართოება კვლავ იმ სეგმენტს დააინტერესებს, ვისაც ქალაქიდან მოშორებული ადგილმდებარეობა არ აფერხებს, ვისთვისაც პრიორიტეტულია გარემო და ბუნებასთან სიახლოვე. ამ მოთხოვნების დაკმაყოფილებისთვის მზად ვართ გავფართოვდეთ და მეტ მშობელს მივცეთ საშუალება ატარონ შვილები ჩვენთან.

ხოლო სრულიად ახალი ლოკაცია თბილისში, დააინტერესებს მათ, ვინც ამ დრომდე თავს იკავებდა გეოგრაფიული მდებარეობის გამო. რა თქმა უნდა, „ბაქსვუდი“ ახალ ლოკაციაზე სტრატეგიის ნაწილია, რომელიც გამოწვეულია გაზრდილი მოთხოვნით,“ - ამბობს ნინო ფალავანდიშვილი.

პროექტის ესკიზური მონახაზი არქიტექტურულ კომპანია „არქიდეას“ ეკუთვნის, თუმცა პროექტი არ არის საბოლოო, ის დამუშავების ეტაპზეა.

მარიამ მორგოშია