ერთ თვეზე მეტი გავიდა, რაც საფინანსო ინსტიტუტები მსესხებლებისთვის საშეღავათო პერიოდით სარგებლობის ინიციატივით გამოვიდნენ. კომერციული ბანკების და მიკროსაფინანსო ორგანიზაციების მიერ, სესხების რესტრუქტურიზაცია ეკონომიკის სტიმულირების იმ გეგმის ნაწილია, რომელიც კორონავირუსის გავრცელების გამო შექმნილი მდგომარეობით დაზარალებულ მოქალაქეებს და ბიზნესს მთავრობის რეკომენდაციით საფინანსო სექტორმა შესთავაზა.
სესხებზე საშეღავათო პერიოდი 13 მარტიდან დაიწყო და 30 ივნისის ჩათვლით გაგრძელდება. საფინანსო ინსტიტუტების განცხადებით, სესხების გადავადებით სარგებლობა ნებაყოფლობითია და მსესხებლის სურვილზეა დამოკიდებული. სამთვიანი საშეღავათო პერიოდის განმავლობაში ფიზიკურ პირებს არ უწევთ არც სესხის ძირის და არც პროცენტის გადახდა, მსესხებელი საბანკო ვალდებულების დაფარვას ივნისიდან გააგრძელებს.
„საზოგადოება და ბანკების” დამფუძნებელი გიორგი კეპულაძე „კომერსანტთან“ საუბრისას ამბობს, რომ მიუხედავად აზრთა სხვადასხვაობისა, ის ფაქტი, რომ ბევრმა ადამიანმა ისარგებლა სესხების გადავადების პროგრამით, ნიშნავს იმას, რომ ბანკების შეთავაზება კარგი იყო.
„როგორც ვიცი ძალიან ბევრმა ისარგებლა საშეღავათო პერიოდით, ვისაც კი ოდნავი ეჭვი ჰქონდა, რომ პრობლემები შეექმნებოდა შემოსავლების კუთხით, იმათაც გამოიყენეს. ის ფაქტი, რომ ბევრმა ადამიანმა ისარგებლა გადავადებით, იმას ნიშნავს, რომ კარგი შეთავაზება იყო. შეიძლება ვისაუბროთ იმაზე, რომ ბანკებს მეტი შეეძლოთ ან საერთოდ რატომ გვთხოვენ პროცენტს, მაგრამ ბანკი არ არის საქველმოქმედო ორგანიზაცია და მას რიგი ვალდებულებები აქვს, მათ შორის მეანაბრეებთან, ასევე თანამშრომლებთან, ხომ არ გვინდა ისინი სამსახურიდან გაუშვან, ამის გაკეთება კი თუ სესხიდან შენატანები არ გაგრძელდა, ბანკს გაუჭირდება, რადგან ეს მისი ძირითადი შემოსავალია. თუ ბანკში მსესხებლები თანხას არ შეიტანენ, შესაბამის ანაზღაურებას ვერც მეანაბრეები მიიღებენ. ზოგადად ამ ინიციატივით ბანკებმა მილიონობით შემოსავალი დაკარგეს და წაგება საკმაოდ დიდია. თუ საჭირო იქნება, კვლავ მოხდება გარკვეული შეღავათების დაწესება, ალბათ კომერციული ბანკები ეროვნულ ბანკთან ერთად ამაზეც იმსჯელებენ. პირველ რიგში კი იმისთვის, რომ ჩვენ არც შეღავათი დაგვჭირდეს და მალე გამოვიდეთ ამ მდგომარეობიდან საჭიროა, რომ სწრაფად გავიაროთ ეს კრიზისული ეპიდემიოლოგიური პერიოდი“, - განაცხადა გიორგი კეპულაძემ.