2020 წლის მესამე კვარტლის მონაცემების მიხედვით, პანდემიის მიუხედავად ბანკებისთვის ყველაზე მიმზიდველი ვაჭრობისა და მომსახურების სექტორის დაკრედიტება რჩება. თუმცა, სექტემბერში, ივნისთან შედარებით, საკრედიტო პორტფელის წლიური ზრდა შემცირდა და გაცვლითი კურსის ეფექტის გამორიცხვით, 12.0% შეადგინა.

დარგობრივ ჭრილში, 2020 წლის 9 თვის მონაცემებით, დომინანტი სამეული უცვლელია ვაჭრობა, მშენებლობა და მრეწველობა. აღსანიშნავია, რომ ენერგეტიკის სექტორის დაკრედიტება შემცირებულია.

მიმდინარე წლის 9 თვეში კომერციულმა ბანკებმა ყველაზე დიდი მოცულობის თანხები ვაჭრობის სექტორისთვის გამოყვეს, რომელმაც 3.1 მლრდ. ლარი შეადგინა (გასული წლის ანალოგიურ პერიოდში 4.4 მლრდ ლარი იყო), მშენებლობისთვის 1.3 მლრდ. ლარი გაიცა (გასული წლის ანალოგიურ პერიოდში 1.7 მლრდ. ლარი იყო) და მრეწველობისთვის 0.9 მლრდ. ლარი გასცეს (გასული წლის ანალოგიურ პერიოდში 1 მლრდ ლარი იყო).

სებ-ის ინფორმაციით, საკრედიტო პირობების კვლევის მიხედვით, მომდევნო კვარტალში საბანკო სექტორის წარმომადგენლები ბიზნესს და საცალო სესხებზე მოთხოვნის მცირედით ზრდას ელოდებიან.