„ბოლო 11 წლის მანძილზე,2020 წელი გლობალური ეკონომიკისთვის შესაძლოა ყველაზე მძიმე იყოს“- ასეთია Bank of America-ს პროგნოზი.ფინანსური ინსტიტუტის ექსპერტების აზრით, მთავარი საფრთხეებია კორონავირუსი, აშშ-ჩინეთის სავაჭრო ომი და ამერიკის საპრეზიდენტო არჩევნები.
2020 წლის მსოფლიო ეკონომიკის ზრდა იქნება ყველაზე სუსტი 2008-2009 წლის გლობალური კრიზისის შემდეგ. სავარაუდოდ,ეს მაჩვენებელი შეადგენს მხოლოდ 2,8%, რაც იქნება ყველაზე დაბალი ზრდა ბოლო 11 წლის მანძილზე.„დასამალი ადგილი არ იარსებებს“ - წერია ბანკის მიერ გავრცელებულ მიმოხილვაში.
ექსპერტების აზრით,კორონავირუსის საფრთხე გააგრძელებს ეკონომიკაზე ნეგატიური გავლენის მოხდენას. პირველ რიგში, ეს ეხება ჩინეთს - მსოფლიოს სიდიდით მეორე ეკონომიკის ზრდა 5, 9%-დან 5,2%-მდე უკვე შემცირდა.
„მსოფლიო ეკონომიკის სისუსტემ განაპირობა არასაკმარისი მდგრადობა ძლიერი შოკის წინაშე. სამწუხაროდ, კორონავირუსი სულ უფრო მეტად წააგავს ასეთ შოკს“ - მიიჩნევენ Bank of America - ში.
ასევე ერთ-ერთი ნეგატიური ფაქტორია აშშ-ს და ჩინეთის სავაჭრო ომი, ამას ემატება პოლიტიკური გაურკვევლობა იაპონიაში და სამხრეთ ამერიკის რიგ ქვეყნებში.„ჩინეთში შექმნილი პრობლემური მდგომარეობა ნეგატიურად იმოქმედებს მიწოდების საერთაშორისო ჯაჭვებზე. სუსტი ტურისტული ნაკადები ასევე შეამცირებენ ზრდას აზიის ქვეყნებში, სადაც ტრადიციულად ბევრი ჩინელი ტურისტი ჩადის“ - ნათქვამია დოკუმენტში.
კორონავირუსის ლოკალური გამოვლინებები, ისეთები, როგორიცაა დღეს იტალიაში, შესაძლოა განმეორდეს სხვა ქვეყნებში, რაც გამოიწვევს ახალ კარანტინებს, ეს კი არ შეუწყობს ხელს სტაბილურობას და ხვალინდელი დღის რწმენას.
თუმცა, ყველაფერი ამის მიუხედავად, მსოფლიო ეკონომიკა უმნიშვნელოდ, მაგრამ მაინც გაიზრდება, საქმე არ მივა კორონავირუსის მასშტაბურ პანდემიამდე, ხოლო ეკონომიკაში არ იქნება რეცესია.
კორონავირუსის მიერ გამოწვეული ეფექტი იქნება მხოლოდ დამამძიმებელი ფაქტორი, თუმცა, თავად ეკონომიკის ზრდის შენელება გამოწვეულია სხვა მიზეზებით. მათ გავლენას ასევე გააძლიერებს საპრეზიდენტო არჩევნები შტატებში, რომლებიც ჩატარდება 2020 წლის ნოემბერში.
„მომავალი არჩევნები ძალიან მნიშვნელოვანი საკითხია, რადგანაც, დემოკრატი-პრეზიდენტის არჩევის შემთხვევაში მოსალოდნელია სავაჭრო პოლიტიკის სერიოზული ცვლილება“ - მიიჩნევენ Bank of America-ს ექსპერტები.
შექმნილ სიტუაციაში საინვესტიციო აქტივობა შემცირდება მანამ, სანამ თამაშის წესები გახდება უფრო გასაგები და სტაბილური - ზოგადად კი, ყოველგვარ გაურკვევლობას ყოველთვის მოაქვს გრძელვადიანი ნეგატიური ეფექტი.ასევე ანალიტიკოსები არ გამორიცხავენ სხვადასხვა ქვეყნების ცენტრალური ბანკების მხრიდან მონეტარული პოლიტიკოს გამკაცრებას, რაც ასევე არ შეუწყობს ხელს ეკონომიკურ ზრდას.
forbes.ru
თენგიზ აბლოთია