„მთის ინფრასტრუქტურის ნაწილში ყველაფერი მწყობრში გვაქვს, რა ვალდებულებებიც გვქონდა საერთაშორისო სათხილამურო ფედერაციის (FIS) წინაშე ყველაფერი უმოკლეს ვადებში განვახორციელეთ“, - ამის შესახებ „კომერსანტს“ მთის ტრასების სააგენტოში განუცხადეს. კომპანიის განმარტებითვე, მათ მიერ გაწეული სამუშაოები საერთაშორისო სათხილამურო ფედერაციამ (FIS) დადებითად შეაფასა.

„ამ წუთას აქტიურად მიმდინარეობს ბაკურიანში საშეჯიბრო ტრასების გათოვლიანება. საერთაშორისო რანგის შეჯიბრებები ბუნებრივ თოვლზე არ ტარდება. კლიმატი გვაძლევს იმის საშუალებას ვაწარმოოთ დიდი ოდენობით კარგი ხარისხის ხელოვნური თოვლი, თუ ბუნებრივი ნალექიც დაგვეწევა ეს იქება ძალიან კარგი. აქტიურად ვემზადებით, მსოფლიო ჩემპიონატი16 თებერვლიდან 5 მარტამდე გაგრძელდება, ეს იქნება წლის მთავარი მოვლენა.

მსოფლიო ჩემპიონატი საქართველოს ტურისტულ შესაძლებლობებს განვითარების სრულიად ახალ მიმართულებას მისცემს. 2023 წლის მსოფლიო ჩემპიონატს საქართველო ღირსეულად გაართმევს თავს და მსოფლიო რუკაზე დაიმკვიდრებს საპატიო ადგილს ზამთრის ტურიზმის მიმართულებით. ახალი ინფრასტრუქტურა კი რჩება კურორტს და ათეული წლები მოემსახურება ბაკურიანში ვიზიტორების გაზრდილ ოდენობას, რაც ხელს შეუწყობს კურორტის ცნობადობის გაზრდას საერთაშორისო მასშტაბით“, - განმარტავენ მთის ტრასების სააგენტოში.

როგორც ცნობილია, მსოფლიო ჩემპიონატის პროექტის ფარგლებში ბაკურიანში აშენდა 3 ახალი საბაგირო, უმოკლეს ვადებში აშენდა ასევე წყლის 2 ხელოვნური რეზერვუარი დიდველისა და მიტარბის არეალში.

„ხელოვნური რეზერვუარები უმნიშვნელოვანესია გათოვლიანების სისტემების სრულყოფილად ფუნქციონირებისათვის. მსოფლიოს მასშტაბით, ერთ კონტრაქტში პირველად განხორციელდა უდიდესი პროექტი რომელიც არის 29 კმ-იანი ხელოვნური გათოვლიანების სისტემა - დიდველი, კოხტა, მიტარბის არეალში. გაკეთდა 6 ახალი საშეჯიბრო ტრასა, შეძენილი იქნა სპეცტექნიკა უსაფრთხოების ინვენტარი“, - აცხადებენ მთის ტრასების სააგენტოში.