ევროპამ კოლექტიურად შვებით ამოისუნთქა - ბრიუსელის და ევროკავშირის დედაქალაქების თბილმა რეაქციამ დაადასტურა, რომ ევროპელებს ბაიდენის გამარჯვებაზე მეტად ტრამპის დამარცხება უხარიათ.
თუმცა, ყველა თანხმდება, რომ ტრამპის პერიოდში ჩრდილოეთ ატლანტიკურ ურთიერთობებში იმდენი რამ შეიცვალა, რომ ძველი რეალობის აღდგენა საკმაოდ რთული იქნება. ტრამპის არამეგობრული და არაპროგნოზირებადი დამოკიდებულება ევროპელი მოკავშირეებისადმი კიდევ დიდხანს დარჩება ევროპელების მეხსიერებაში.
თუმცა, ამავე დროს გაჩნდა იმედი, რომ ტრანსატლანტიკური ურთიერთობები და ერთიანი დასავლეთის იდეა განვითარების ახალ შანს მიიღებენ.
გერმანიის პრემიერ-მინისტრმა ანგელა მერკელმა ბაიდენისადმი გაგზავნილ მისალოც წერილში განაცხადა, რომ ევროპა საკუთარ უსაფრთხოებაზე მეტ პასუხისმგებლობას აიღებს.
რა თქმა უნდა, ეს თავდაცვითი ხარჯების ზრდასაც მოითხოვს, რაც კორონაკრიზისის და რეცესიის პირობებში ადვილი არ იქნება.
ბევრი ექსპერტი შიშობს, რომ ემანუელ მაკრონის იდეა „სტრატეგიული ავტონომიის“ შექმნის თაობაზე, რომელმაც აქტუალურობა სწორედ ტრამპის არაპროგნოზირებადობის გამო შეიძინა, ბაიდენის არჩევის შემდეგ ჩავარდება.
თუმცა, ევროპის საკითხებში საფრანგეთის სახელმწიფო მინისტრის კლემან ბონის თქმით, თეთრი სახლის პატრონის ცვლილება არაფერს ცვლის - ევროპამ საკუთარი თავის იმედად ყოფნა უნდა ისწავლის.
განსაკუთრებით ბაიდენის არჩევა ევროკავშირს ეკონომიკური თვალსაზრისით გაუხარდა - შტატები ხომ ევროკავშირის მთავარი სავაჭრო პარტნიორია, ტრამპი კი რამდენიმე სავაჭრო ომი წამოიწყო, მათ შორის ევროპასთან.
დონალდ ტრამპი პროტექციონიზმის და ევროპიდან იმპორტის მკვეთრი შემცირების მომხრეა - ტრამპის მიერ შემოღებული ტარიფები მეტალურგიული პროდუქციის იმპორტზე, მათ შორის ევროპიდან, დღესაც მოქმედებს.
რას მოიმოქმედებს ბაიდენი? დაასრულებს ის პროტექციონიზმს, თუ ტრამპის მიდგომას გააგრძელებს?
როგორც ჩანს, ევროპა აქაც შვებით ამოისუნთქავს - ბაიდენის მრჩეველმა სავაჭრო საკითხებში განაცხადა, რომ პრეზიდენტს სურს ტრამპის მიერ დაწყებული ეკონომიკური დავების შეწყვეტა. მისი თქმით, მომავალი პრეზიდენტი ევროკავშირთან ურთიერთობების, მათ შორის, ეკონომიკურის, გააქტიურებას აპირებს.
ბრიუსელი ასევე იმედოვნებს, რომ ბაიდენი ბრიტანეთზე ევროკავშირთან დასკვნით შეთანხმებასთან დაკავშირებით ზეწოლას გაზრდის - აშშ-ს მომავალი პრეზიდენტი წარმოშობით ირლანდიელია და ის უარყოფითად უყურებს ბრექსიტს - მათ შორის ირლანდიასთან დაკავშირებული პრობლემების გამო.
nzz.ch
მოამზადა თენგიზ აბლოთიამ
ჯო ბაიდენი
