აშშ-ს ახალმა პრეზიდენტმა რუსეთს ალექსეი ნავალნის მოწამლვის და დაპატიმრების გამო სანქციები დაუწესა.
გადაწყვეტილების საფუძველი ამერიკის დაზვერვის სამსახურების დასკვნა გახდა, რომლის თანახმადაც მაღალი ალბათობით შეიძლება ითქვას, რომ 2020 წლის აგვისტოში რუსეთის სპეცსამსახურებმა ნავალნის წინაამღდეგ უკვე საყოველთაოდ ცნობილი მომწამლველი ნივთიერება „ნოვიჩოკი“ გამოიყენეს.
პირველ რიგში პერსონალური სანქციები 7 რუსი მაღალჩინოსნის - პრეზიდენტის ადმინისტრაციის უფროსის მოადგილის სერგეი კირიენკოს, დაზვერვის ფედერალური სამსახურის უფროსის ალექსანდრ ბორტნიკოვის, სასჯელაღსრულების სამსახურის უფროსის ალექსანდრ კალაშნიკოვის, გენერალური პროკურორის იროგ კრასნოვის, თავდაცვის მინისტრის მოადგილეების ალექსეი კრივორუჩკოს და პაველ პოპოვის, ასევე პრეზიდენტის ადმინისტრაციის შიდა პოლიტიკის სამმართველოს უფროსის ანდრეი იარინის წინაამღდეგ ამოქმედდა.
მათ შტატებში შემოსვა აეკრძალათ, და მათ ანგარიშები ამერიკის ბანკებში დაიბლოკება (თუ მათ ეს ანგარიშები აქვთ).
ეს მაღალჩინოსნენი ასევე ევროკავშირის სანქციების ქვეშ მოხვდნენ. თუმცა, არის პუტინის გარემოცვის 3 წევრი, რომელიც ევროკავშირის სიაში მოხვდა, ამერიკულს კი - გადაურჩა - საგამომძიებლო კომიტეტის უფროსი სერგეი ბასტრიკინი, რუსეთის ეროვნულ გვარდიის სარდალი ვიქტორ ზოლოტოვი, და პრეზიდენტის წარმომადგენელი ციმბირის ფედერალურ ოლქში სერგეი მენიაილო,
მაღალჩინოსნებს გარდა, სანქციები თავდაცვის სამინისტროსთან დაკავშირებული რამდენიმე კვლევით ინსტიტუტსაც დაეკისრა - სავარაუდოდ, „ ნოვიჩოკის“ შექმნის გამო.
აშშ-ს ვაჭრობის სამინისტროს ხაზით, აკრძალვები 14 სტრუქტურას შეეხება, რომელთა საქმიანობა „აშშ-ს საგარეო პოლიტიკას და ეროვნულ უსაფრთხოებას ემუქრება“ - მათ შორის 3 გერმანული და 1 შვეიცარიული კომპანია, რომელიც ბიოლოგიური და ქიმიური იარაღის შექმნაში მონაწილეობას იღებდა.
სანქციების ქვეშ რამდენიმე რუსული ქიმიური კომპანიაც მოხვდა, რომელსაც ამერიკული პროდუქციის იმპორტი აეკრძალათ.
ეს ქიმიური იარაღის გამოყენების გამო რუსეთის წინაამღდეგ სანქციების დაკისრების მეორე შემთხვევაა - პირველი ინგლისში სკრიპალების მოწამლვას შეეხებოდა.
ამჟამად გამოცხადებული რამდენიმე ზომა წინა წლებში შემოღებულ სანქციებს იმეორებს, მათ შორის ნაწილი სიმბოლური ხასიათისაა - მაგალითად, რუსეთში ამერიკული შეიარაღების ექსპორტის აკრძალვა. როგორც ცნობილია, რუსეთი ამერიკულ იარაღს არ ყიდულობს, და არასდროს არ ყიდულობდა.
ბაიდენის ადმინისტრაციის მიერ შემოღებული სანქციები 12 თვის მანძილზე იმოქმედებს, მათი მოხსნა რამდენიმე პირობაზეა დამოკიდებული - მათ შორისაა ალექსეი ნავალნის განთავისუფლება და რუსეთის ხელმძღვანელობის მხრიდან ქიმიური იარაღის გამოუყენებლობის გარანტიების მიცემა.
კანონიო ქიმიურ იარაღზე კონტროლის თაობაზე სანქციების შემოღების მეორე ეტაპსაც ითვალისწინებს - მათ შორის ისეთი მკაცრი ზომებია, როგორც ვაჭრობის, ექსპორტ-იმპორტის შეზღუდვა, სახელმწიფო ავიაკომპანია „აეროფლოტისთვის“ ამერიკაში ფრენების აკრძალვა, და ა.შ.
თუმცა, ამ ეტაპზე მეორე რაუნდის შესაძლებლობა არ განიხილება - ყოველ შემთხვევაში, ოფიციალურ ინფორმაციაში ამის შესახებ არაფერია ნათქვამი.
rbc
მოამზადა თენგიზ აბლოთიამ
ჯო ბაიდენი 
