აშშ-ის 46-ე პრეზიდენტისთვის ეკოლოგიური გარემოს გაუმჯობესება მის ერთ-ერთ პრიორიტეტს წარმოადგენს. პარიზის კლიმატის ხელშეკრულებაში დაბრუნების განაცხადის შემდეგ, მსოფლიომ კიდევ ერთი სიახლის შესახებ შეიტყო, რაც ფედერალურ ავტოპარკის სრულად ელექტრომობილით ჩანაცვლებას გულისხმობს. საუბარი 650 000 ავტომობილს ეხება.
პრეზიდენტის ინიციატივა ეკონომიკური კრიზისიდან თავის დაღწევასაც ისახავს მიზნად. ელექტრომობილები ამერიკაში უნდა იყოს დამზადებული. თეთს სახლში ფიქრობენ, რომ წარმოების ზრდა ეკოლოგიურ გარემოსთან ერთად დასაქმების მაჩვენებელსაც გააუმჯობესებს.
სახელმწიფო ავტოპარკი სულ 650 000 შიდაწვისძრავიან მანქანას მოიცავს, მათგან 245 000 სამოქალაქო დანიშნულებისაა, 173 000 სამხედრო და 225 000 საფოსტო გადაზიდვებისთვის. 2019 წელს მათ ჯამში 7.242 მლრდ კმ გაიარეს.
ელექტრომობილი უკვე წლებია TESLA-სთან ასოცირდება, თუმცა ტენდერში მონაწილეობა FORD-ს, GM-სა და სხვა ავტომწარმოებლებსაც შეეძლებათ.
წინასწარი მონაცემებით 2020 წელს მსოფლიო მასშტაბით რეკორდული რაოდენობის 3.2 მლნ ელექტომობილი გაიყიდა. რაც საერთო გაყიდვების 4.2%-ა. 2014 წელს ის 0.4%-ს შეადგენდა, 2016 წელს - 0.9%, 2018 წელს კი 2.2%. ყოველი 13 ელექტრომობილიდან 2 ტესლას ეკუთვნის. მიუხედავად იმისა, რომ ტესლას წლიური წარმადობა ტოიოტას მაჩვენებელს 20-ჯერ ჩამორჩება ტესლას კაპიტალიზაცია $840 მლრდ-ს შეადგენს, ხოლო ტოიოტასი - 3.65-ჯერ ნაკლებს - $230 მლრდ-ს. პლანეტის უმდიდრესი ადამიანის ტიტულსაც ილონ მასკი ჯეფ ბეზოსთან ერთად იყოფს.
ელექტრომობილების წილი საერთო ავტოპარკში ჯერ კიდევ 1%-ზე ნაკლებია. მათი ღირებულება მნიშვნელოვნად შემცირდა, ერთ დამუხტვაზე გასავლელი მანძილიც გასამმაგდა, თუმცა დამუხტვის დრო კვლავ გადაუჭრელ პრობლემად რჩება. სწრაფდამტენიც კი, რომლის ხშირი გამოყენებაც არარეკომენდირებულია მის სრულ დამუხტვას 30 წუთს ანდომებს, ჩვეულებრივი დამტენი 8 საათს ან მეტს.
განვითარებულ სახელმწიფოთა უმრავლესობა უახლოეს 10-20 წელიწადში სრულად აპირებს ელექტრომობილებზე, ან რომელიმე სხვა ეკოლოგიური საწვავის მქონე, უპირველესად წყალბადის, ავტომობილებზე გადასვლას. გეგმა ორეტაპიანია 2030 წლისთვის ევროპის ბევრი ქვეყანა შიდაწვისძრავიანი ავტომობილების წარმოებისა და იმპორტის აკრძალვას გეგმავს, 2040 წლიდან მათ ქუჩებში გადაადგილებას. მიზანთან ყველაზე ახლოს ნორვეგიაა. 2020 წელს იმპორტირებული ავტომობილების 54.3% ელექტრომობილი იყო.
გიორგი ელიზბარაშვილი