„ბაიას ღვინო“, რომელიც ბაღდათში, სოფელ ობჩაში იწარმოება, ადგილობრივ ბაზარზე, რესტორნებსა და ღვინის მაღაზიებში იყიდება. შეზღუდვებიდან გამომდინარე მოთხოვნა შემცირდა, თუმცა ონალინ გაყიდვებით, ქართველი მომხმარებლების მხრიდან აქტივობა ბევრად გაიზარდა.
„ბაიას ღვინის“ დამფუძნებელი ბაია აბულაძე „კომერსანტთან“ განმარტავს, რომ „ბაიას ღვინო“ წარმოებას აფართოებს და მალე ახალი იმერული ჯიშებით, ახალი სახეობების ღვინის წარმოება დაიწყება.
„წარმოების მხრივ, ძალიან საინტერესო წელი გვქონდა. ბევრ გამოცდილებას ვიღებთ და უფრო საინტერესო ღვინოებს ვაწარმოებთ, წელს ჩვენი ყურძნის ხარისხი ძალიან გაიზარდა და მეტი დრო დავუთმეთ ვენახში მუშაობას. ამასთან, ტრადიციული იმერული წესებით დავაყენეთ ღვინოები და ახლა დაღვინების პროცესს გადის. ჩვენ ტურისტული ობიექტი გვქონდა, სადაც ბევრი უცხოელი და ქართველი გვსტუმრობდა, მაგრამ ეს საქმიანობა შევაჩერეთ უსაფრთხოების მიზნით. მაგრამ ვიმედოვნებთ, რომ მომავალი წლიდან ბევრი ვიზიტორი გვეყოლება. გაყიდვების კუთხით ონალინ პლატფორმები დაგვეხმარა - ქართველმა მომხმარებელმა ქართული ღვინის შეძენა აქტიურად დაიწყო. უფრო და უფრო იზრდება მომხმარებელში ქართული ღვინის კულტურა.
ასევე, ბევრი სიახლე გვაქვს, ახალი ნაკვეთები შევიძინეთ და მალე საინტერესო იმერულ ჯიშებს გავაშენებთ, ეს იქნება სოფელ ობჩაში. დიდი სურვილი გვაქვს რომ ღვინის საერთაშორისო გამოფენებში მივიღოთ მონაწილეობა, ასევე გვინდა, რომ ჩვენს პარტნიორებს შევუწყოთ ხელი, რომ ხარისხიანი პროდუქცია გავატანოთ უცხოეთის ბაზარზე,“ - ამბობს მეღვინე.
კომპანია ამ ეტაპზე, წლიურად 9000 ბოთლ ღვინოს აწარმოებს, რომლებიც გარდა ადგილობრივი ბაზრისა, ექსპორტზეც ხვდება ამერიკასა და ევროპაში. ჯამში დაახლოებით 10 ქვეყანაში გადის.
კომპანიის დასაარსებლად დაახლოებით 10 000 ლარიანი ინვესტიცია განხორციელდა, საიდანაც 5000 ლარს სააგენტოს „აწარმოე საქართველოში“ დაფინანსებას მოიცავდა.