Babko (ბაბკო) სტარტაპია, რომელმაც სულ მცირე ხანში უამრავი ქართველი მომხმარებლის გული მოიგო და მამაკაცის სამოსის ქართულ ბაზარზე საკუთარი ნიშა დაიკავა. ბრენდი თებერვალში შეიქმნა, ხოლო უკვე მარტში მზა სამოსის ონლაინ გაყიდვაც დაიწყო.
ქართული კომპანიის პირველ ნაბიჯებზე ,,კომერსანტთან“ საუბრობს ,,ბაბკოს“ თანადამფუძნებელი, დიზაინერი ვასო შუკაკიძე. იგი ტანსაცმლის ბიზნესს გიორგი შუკაკიძესა და ლაშა ჩუთლაშვილთან ერთად უდგას სათავეში და გვიზიარებს გამოცდილებას, რომელიც პანდემიისას ქართული ნაწარმის პოპულარიზაციას და ახალი ბრენდის წარმატებას უკავშირდება.
,,საქმიანობა დავიწყეთ პანდემიის პერიოდში, თებერვალში ბრენდი შევქმენით და პირველი სამოსი მომხმარებელს მარტში წარვუდგინეთ. მაისურებით დავიწყეთ და თანდათან გავაფართოვეთ წარმოება, ამ ეტაპზე ვკერავთ ყველა სეზონის ტანსაცმელს, დავამატეთ ქალისა და ბავშვის ხაზიც, უფრო გავფართოვდით, რაც მოთხოვნის ზრდამ განაპირობა. გარდა იმისა, რომ ,,ბაბკო“ ქართულია, ფასითა და ხარისხითაც დიდ ყურადღებას იქცევს. თამამად შეგვიძლია თქმა, რომ ეს არის ჩვენი წარმატების ფორმულაც. წარმოების საწყის ეტაპზე ვაკვირდებოდით ქართულ ბაზარს, კონკურენტების საქმიანობას და ვხედავდით, რომ მათ მიერ შექმნილი პროდუქცია საკმაოდ ძვირი იყო, რის გამოც გადავწყვიტეთ, ჩვენი ტანსაცმელი მაქსიმალურად მოგვერგო სოციუმისთვის, ხელმისაწვდომი ყოფილიყო და ხარისხიანი. დღესდღეობით ყველა მომხმარებელი კმაყოფილია“, - ამბობს ბასო შუკაკიძე ,,კომერსანტთან“.
მოთხოვნის ზრდასთან ერთად, არჩევანიც გაფართოვდა, ამ ეტაპზე ,,ბაბკოს“ ბრენდით იყიდება ქალის ტანსაცმელიც და მალე გაყიდვაში ბავშვის ხაზიც ჩაერთვება.
რაც შეეხება ფასს, როგორც დიზაინერი აღნიშნავს, 30 ლარიდან იწყება და 180 ლარამდეა.
მას შემდეგ, რაც ქართულ ბაზარს აითვისებს, „ბაბკო“ პროდუქციას ექსპორტზეც გაიტანს. მწარმოებლებს დაგეგმილი აქვთ მაღაზიის გახსნა.
ბიზნესი მიმდინარე წლის დასაწყისში 3000 ლარით წამოიწყეს და დაახლოებით 2 წელიწადში ექნებათ საკუთარი მაღაზიაც, რომლის სავარაუდო საინვესტიციო კაპიტალი 30 000-40 000 ლარის ფარგლებშია.
გარდა მაღაზიისა, ,,ბაბკო“ საკუთარი ატელიეს გახსნასაც გეგმავს. ამ ეტაპზე მისი პარტნიორია ატელიე „NP Line“, სადაც ახალი ქართული ბრენდის სამოსი იკერება.
ვასო შუკაკიძის თქმით, წარმოების ზრდასთან ერთად გაიზრდება თანამშრომელთა რაოდენობა და საწყის ეტაპზე დამატებით 6 ადამიანი დასაქმდება.
მარი ჩიტაია