ირანმა, აზერბაიჯანმა და საქართველომ სპარსეთის ყურის შავ ზღვასთან დამაკავშირებელი სატრანზიტო მარშრუტის ორგანიზებაზე შეთანხმებას მიაღწიეს. აღნიშნულტან დაკავშირებით საერთაშორისო ტრანზიტისა და ტრანსპორტის დეპარტამენტის ირანული ორგანიზაციის გენერალურმა დირექტორმა ჯავად ჰედაათიმ განაცხადა.
მისი თქმით, აღნიშნული გეგმა ჯერ კიდევ რვა წლის წინ შემუშავდა, თუმცა ამ დრომდე მხარეებს შორის შეთანხმება ვერ ხერხდებოდა.
„აზერბაიჯანის და საქართველოს წარმომადგენლებთან ორი შეხვედრის შემდეგ, ჩვენ მათ შევთავაზეთ ახალი სატრანზიტო დერეფნის შექმნის ინიციატივა რეგიონული კონვერგენციისთვის. შეთანხმების მთავარი მხარეები საქართველო და ირანი არიან, რადგან ირანი თავისუფალ წყლებს სპარსეთის ყურის გავლით უკავშირდება, ხოლო საქართველოს ორი მნიშვნელოვანი სავაჭრო პორტი აქვს შავი ზღვის აღმოსავლეთით. მეორე მხრივ, საქართველომ და აზერბაიჯანმა დიდი ძალისხმევა ჩადეს სატრანსპორტო ინფრასტრუქტურის გაუმჯობესებასა და განვითარებაში, ამიტომ ჩვენ ვეცადეთ, ამ ორ ქვეყანასთან თანამშრომლობა გაგვეფართოებინა“, - განაცხადა მან.
შეთანხმების თანახმად, პირველ რიგში, მომდევნო ოთხი თვის განმავლობაში საპილოტე ტვირთები ირანიდან გაიგზავნება აზერბაიჯანში ასტარას საზღვრის გავლით, ასევე შავი ზღვით ბულგარეთში ან აღმოსავლეთ ევროპის სხვა ქვეყნებში საქართველოს პორტების გავლით.
როგორც ჯავად ჰაადათიმ განაცხადა, ცდილობენ, რომ პროექტის საპილოტე ფაზა წლის ბოლომდე დაასრულონ (ირანული კალენდრით, 2022 წლის 20 მარტი), რათა დაბრკოლებების და პრობლემების იდენტიფიცირება მოხდეს.
მან ასევე აღნიშნა, რომ სამ ქვეყანას შორის გამართულ ფინალურ შეხვედრაზე შეიქმნება მექანიზმი, რომელიც ტვირთების მიწოდების ღირებულებას და დროს შეამცირებს.