უკვე ორი თვე გავიდა მას შემდეგ,რაც ლევან გოგიჩაიშვილმა ახალი საკანონმდებლო ინიციატივა დაარეგისტრირა. დამოუკიდებელი დეპუტატი აზარტული და მომგებიანი თამაშების საკანონმდებლო ჩარჩოში მოქცევას უკვე მეორედ ცდილობს. მმართველი გუნდის ყოფილი წევრის მცდელობის მიუხედავად, კანონპროექტის საკომიტეტო განხილვა ამ დრომდე არ დაწყებულა. საქართველოში ფსონების მიღება ისევ ისეთივე მარტივია, როგორც აქამდე იყო, ისევ ასობით ადამიანი იღებს კრედიტებს აზარტული თამაშების გამო. 

„საქართველოს პარლამენტში კანონპროექტის განხილვის ვადა 4 - დან 5 კვირამდეა, ამის შემდეგ საკომიტეტო განხილვები უნდა დაიწყოს. მაგრამ იქედან გამომდინარე, რომ რეგლამენტი კომიტეტებს უფლებას აძლევს ბიუროს მიმართოს და ვადა გააგრძელოს, კანონპროექტის განხილვა უკვე ორი თვეა არ ხდება. ამ საკანონმდებლო ჩანაწერით მათ შეუძლიათ ეს კანონპროექტი საერთოდ არ განიხილონ და რამდენჯერმე გადაავადონ. ჩვენ უნდა ვაიძულოთ „ქართული ოცნება“ აღნიშნული კანონპროექტის კომიტეტებში განხილვა დაიწყოს. ნებისმიერ დეპუტატს, რომ ჰკითხო გეტყვის, რომ ძალიან წუხს იმის გამო, რომ სახელმწიფო ამ პრობლემის წინაშე დგას, მაგრამ საქმე საქმეზე რომ მივა, ეს დეპუტატი ან თავს შეიკავებს კენჭისყრის დროს ან ხელს საერთოდ წითელ ღილაკს დააჭერს, რომ თავის პარტიულ ბოსს ასიამოვნოს“, - განმარტავს ლევან გოგიჩაიშვილი.

კითხვაზე- რატომ ფერხდება აზარტული თამაშების რეკლამის შეზღუდვა, ლევან გოგიჩაიშვილი გვპასუხობს, რომ სათამაშო ბიზნესს გავლენიანი მფარველები ჰყავს. მისი განმარტებით, მმართველ პარტიას არა აქვს ინტერესი, სათამაშო ბიზნესს შეზღუდვები დაუწესოს, რადგან სათამაშო ბიზნესი „ქართული ოცნების“  შავ სალაროს აფინანსებს.

„ბუნებრივია, რომ ონლაინ კაზინოების სტატუსკვოს ვერავინ ეხება, რადგან ეს არის დღეში მილიონობით ლარის ბრუნვა, ეს არის თანხები,რომელიც შავ ბუღალტერიაში შედის და რომლითაც ფინასნდება პარტია. ეს არის საპარლამენტო თამაშის წესების დარღვევა, ყველა სიტყვაში იტყუებიან. ჩემი კითხვების საპასუხოდ პარლამენტის თავმჯდომარეს ბიუროზე ორი გამოსვლა ჰქონდა, სადაც მან პირობა დადო, რომ შემდგომი კვირის დასაწყისიდან დაავალებს კომიტეტებს კანონპროექტის განხილვას, მისი სიტყვების შემდეგ თვეზე მეტი გავიდა. ვერავის ენდობი, ყველა იტყუება. იტყუება ბიძინა ივანიშვილი, იტყუება პრემიერ მინისტრი, იტყუება პარლამენტის თავმჯდომარე, იტყუებიან კომიტეტის თავმჯდომარეები, ბოლო სამი წლის განმავლობაში ქოსატყუილებად ჩამოყალიბდნენ. ყველა ლიდერი ე.წ. უზენაესიდან დაწყებული და ხელის ბიჭი ლიდერბამდე დამთავრებული ყველანი მატყუარებად ჩამოყალიბდნენ. რა უნდა გავაკეთოთ იმისთვის, რომ ეს პროცესი გადავტეხოთ? აუცილებელია მედიის და საზოგადეობის აქტიურობა, ასევე საპარლამენტო მექანიზმების გამოყენება„-აცხადებს დეპუტატი. 

ლევან გოგიჩაიშვილი დარწმუნებულია, რომ კანონპროექტს ხელისუფლებაში ლობირებენ. 

„აგრესიული მარკეტინგით კიდევ უფრო მეტი ადამიანი იქნება თამაშზე დამოკიდებული, კიდევ უფრო დამძიმდება სოციალური ფონი და კიდევ უფრო მეტად ისარგებლებენ შექმნილი ვითარებით. ვინც ეწინააღმდეგება კანონპროექტის მიღებას იმათ, მოქალაქეები არ უყვართ, ისინი პატივს არ სცემენ ადამიანებს, ტყუილებით და სხვადასხვა ხერხებით საკუთარი კეთილდღეობის ხარჯზე ბევრი ადამიანის მძიმე სოციალურ მდგომაროებაში ჩაგდებას ცდილობენ. არღვევენ კანონებს იმიტომ, რომ რამდენიმე ადამიანი იყოს კარგად ამ ქვეყანაში.  ინსტიტუციური პრობლემები გაქვს კანონის უზენაესობა არ არის, ადამიანები მძიმე სოციალურ მდგომარეობაში არიან და მათი გამო ზარალდება ქვეყნის მომავალი“, - განაცხადა ლევან გოგიჩაიშვილმა.

 ბაჩო ადამია