ბოლო მონაცემებით, საქართველოში სათამაშო ინდუსტრიის ბრუნვამ 2019 წელს 12 მლრდ. ლარს მიაღწია. პარალელურად, იზრდება ამ სექტორის წილი მთლიან ბიზნეს ბრუნვაში. ციფრები ნათლად მეტყველებს ქართული ეკონომიკის უკუღმართი განვითარების შესახებ - უმუშევრობა, წარმოების არარსებობა და კადრების დეფიციტი პირდაპირ კავშირშია აზარტული თამაშების პოპულარობასთან. ასევე სწორედ ეს დარგია ჭარბვალიანობის ერთ-ერთი უმნიშვნელოვანესი წყარო.
„კომერსანტი“ დაინტერესდა როგორ აფასებენ ფაქტს დეპუტატები, რომ ქვეყნის ტოპ 10 საწარმოდან 6 სათამაშო ბიზნესია.
„ვიღაცებს თუ დიდი ბოღმა აქვს, რომ სათამაშო ბიზნესი არსებობს, ამის გამო ხომ არ გავანადგურებთ სფეროს“- ასე აფასებს საკითხს მაჟორიტარი დეპუტატი კახაბერ ოქრიაშვილი. მისი განცხადებით, 10 საწარმოდან რომ 6 აზარტული თამაშების ბიზნესია ნიშნავს, რომ ქვეყანას ეკონომიკა არ აქვს.
„ჩემთვის ის კი არ არის მიუღებელი, რომ აზარტული თამაშები არსებობს ქვეყანაში, არამედ ის, რომ სხვა წარმოება არ გაგვაჩნია და ამაზე უნდა ვიმუშაოთ. წარმოების მხრივ ალტერნატივა არ გვაქვს, რომ ათეულში ადგილი სხვა სფეროებმა დაიკავონ და არა აზარტულმა თამაშებმა.“-ამბობს კახაბერ ოქრიაშვილი და სათამაშო ბიზნესის განვითარებაში ორივე ხელისუფლების პასუხისმგებლობას ხედავს.
როგორც დეპუტატი განმარტავს, ქვეყანაში სათამაშო ბიზნესი რომ ასე ვითარდება ყველა მთავრობის პასუხისმგებლობაა, დაწყებული გამსახურდიას დროიდან დასრულებული დღევანდელი მთავრობით. ის, რომ რეკლამაც კი არ არის აკრძალული სათანადოდ მთავრობის ბრალია. „საერთოდ ყველა ხელისუფლების დროს ხდებოდა ამ ბიზნესის დერეგულირება”- აცხადებს ოქრიაშვილი.
“კომერსანტის” კითხვაზე ეთანხმება თუ არა ექსპერტების მოსაზრებას, რომ სათამაშო ბიზნესი ქვეყნის ეკონომიკურ დოვლათს ვერ ქმნის, არ არის გამჭვირვალე და არ იხდის გადასახადს- დეპუტატი პასუხობს : „ქვეყანაში ეკონომიკის ექსპერტები არ გვყავს და მათ კონკრეტული საქმეების რეალური შეფასება არ იციან“
მაჟორიტარი დეპუტატი ნინო წილოსანი საზოგადოებას პირდდება, რომ 2020 წელს აზარტული თამაშების რეგულირების საკითხთან დაკავშირებით, ერთ-ერთი ყველაზე აქტიური ნაბიჯი გადაიდგმება. მისი თქმით,აზარტული თამაშები კი არ იწვევს სიღარიბეს, არამედ სიღარიბე უბიძგებს თამაშისკენ ადამიანს. ამის დასაძლეად კი საჭიროა ქვეყანაში არსებობდეს აზარტულ თამაშებზე უფრო დიდი სამეწარმეო საქმიანობა.
„გვჭირდება ინდუსტრიალიზაცია და სამეწარმეო განვითარება. თქვენ იცით, რომ ვმუშაობთ ახალ ცვლილებებზე აზარტულ თამაშებთან დაკავშირებით. პარლამენტში რამდენიმე სხვადასხვა ინიციატივა გვაქვს ამ თემასთან დაკავშირებით. ჩვენ 2019 წლის ბოლოსაც გვქონდა გაერთიანებული შეხვედრა, პარლამენტის შიგნით საინიციატივო ჯგუფს შორის, სადაც ვისაუბრეთ თუ რა ცვლილებები უნდა განხორციელდეს, რომ საკითხი მაქსიმალურად მოგვარდეს. რაც მთავარია ყურადღება გავამახვილეთ იმაზე, რომ ჩვენმა ინიციატივებმა აზარტული თამაშები არ გადაიყვანოს იატაკქვეშეთში“-ამბობს ნინო წილოსანი.
„კომერსანტის“ კითხვაზე ყავს თუ არა აზარტულ თამაშებს ლობი ქვეყანაში და ეთანხმება თუ არა ლევან გოგიჩაიშვილის მოსაზრებას, რომ ირაკლი კობახიძე აღნიშნულ ბიზნესს ლობირებდა, ნინო წილოსანი პასუხობს:
„ლევან გოგიჩაიშვილი ძალიან ემოციური ადამიანია და ემოციური გამოსვლის დროს რაციონალური ანალიზი ავიწყდება, იმიტომ რომ სრული პასუხისმგებლობით შემიძლია ვთქვა, რომ ირაკლი კობახიძესა და აზარტულ თამაშებს შორის არანაირი კავშირი არ არსებობს, პირიქით, ის მომხრეა ამ ბიზნესში მკაცრი ცვლილებების. ლობისტებს და მომხრეებს რაც შეეხება ყველა ბიზნესს ჰყავს თავის მომხრე და მესმის, რომ მათი მხრიდან კონკრეტული ბიზნესის დაცვა ხდება მაგარამ ეს არ უკავშირდება კობახიძეს.“
რატომ გაჭიანურდა პარლამენტში აღნიშნული კანონპროექტის ინიცირება, ნინო წილოსანი ამბობს, რომ საჭიროა კანონიპროექტი სწორად და ფრთხილად შევიმუშაოთ, რადგან მას შემდგომი გართულება არ მოჰყვეს.
„მუშაობა განახლდება თებერვლიდან, ამ კანონპროექტში აქტიურად ჩავერთვებით და გარკვეული ფორმულირებების მიღების შემთხვევაში ვფიქრობთ, რომ საგაზაფხულო სესია ნამდვილად იქნება ამ პრობლემის მოგვარების დრო.“-აღნიშნავს წილოსანი.
სუიციდზე აწყობილი ბიზნესი და შემაშფოთებელი სტატისტიკა, რომლის მიხედვითაც, ბოლო სამ თვეში 17-მდე ახალგაზრდამ თავი თამაშებზე დამოკიდებულების გამო მოიკლა, 7-მა კი თვითმკვლელობა სცადა. განსაკუთრებით შემაშფოთებელია გარდაცვლილთა ასაკი, რომელიც 14-წლიდან 31-წლამდე მერყეობს. „კომერსანტი“ დაინტერესდა ხედავენ თუ არა დეპუტატები, ამ შედეგის გამო „ქართული ოცნების“ პასუხისმგებლობას. დეპუტატი ნინო წილოსანი აცხადებს, რომ:
„ბრალდება ლოგიკას მოკლებულია, რადგან პრობლემურ საკითხებს ზუსტად იმ სიმწვავით აღვიქვამთ, რა სიმწვავითაც დგას საზოგადოებაში. ძალიან ვწუხვარ თითოეული ადამიანის ტრაგედიის გამო და ჩვენ ვაკეთებთ ყველაფერს, რომ ეს პრობლემა მოგვარდეს. ინიცირებული საკანონმდებლო ცვლილება, რომელიც ვითომდა აზარტული თამაშების პრობლემას აგვარებდა რეალურად სუიციდის და ტრაგიკული შემთხვევების გამომწვევ მიზეზებს ვერ ჭრიდა. სწორედ ამის გამო ჩვენ ვეცდებით მაქსიმალურად შეჯერებული და სწორი ცვლილებები გავატაროთ აზარტულ თამაშებთან დაკავშირებით.“-აცხადებს ნინო წილოსანი.
ნათია ლომიძე