ზაფხულის დიდი მუსიკალური ფესტივალები - Tbilisi Open Air-ი, Echowaves, თბილისისა და ბათუმის ჯაზფესტივალები, Black sea Arena-ს დიდ სცენაზე დაგეგმილი უცხოელი არტისტების მუსიკალური ღონისძიებები - მუსიკალურმა ინდუსტრიამ 2020 წელს ზაფხულის შემოსავლების ძირითადი წყარო დაკარგა. ფრენების გაუქმების გამო უცხოელი არტისტები ზაფხულში დაგეგმილ მასშტაბურ ფესტივალებში ვერ მონაწილეობენ. პანდემიით გამოწვეული საგანგებო მდგომარეობის გამო კი ხალხის შეკრება განუსაზღვრელი ვადით აკრძალულია.
ჯერჯერობით უცნობია, შეძლებს თუ არა ინდუსტრია ფეხზე დადგომას შემოდგომის დასაწყისში. როგორც წესი, ფესტივალები, სადაც დიდი რაოდენობით ხალხის შეკრება ხდება, პანდემიის დროს ყველაზე ნაკლებად განიხილება, როგორც საზოგადოებისთვის აუცილებელი აქტივობა.
Life is Beautiful Festival, Burning Man, Coachella and Stagecoach, Ultra Music Festival, Tomorrowland Music Festival, Summerfest - ეს საერთაშორისო მუსიკალური ფესტივალების ის მცირე ჩამონათვალია, რომელთაც მსოფლიოს მელომანების დიდი აუდიტორია 2020 წელს ვერ იხილავს.
საქართველოში დაგეგმილი ფესტივალებისა და მუსიკალური კონცერტების დიდი ნაწილის ბედი ჯერჯერობით გაურკვეველია, როგორც ორგანიზატორები ამბობენ, პანდემიის გამო ჩაშლილი ღონისძიებებით მიღებული ზარალი დიდია, თუმცა, იმედოვნებენ, რომ შემოდგონის დასაწყისში ღონისძიებები აღდგება.
2020 წლის Tbilisi Open Air-ი, სამხრეთ კავკასიის ერთერთი ყველაზე დიდი მუსიკალური ფესტივალის ჩატარება ივნისში იგეგმებოდა, თუმცა, როგორც ორგანიზატორების მიერ გავრცელებულ განცხადებაშია ნათქვამი, ღონისძიების ჩატარება სექტემბრის მეორე ნახევარში განიხილება. ზუსტი თარიღი კი 25 ივნისამდე გახდება ცნობილი. Tbilisi Open Air-ის ჩატარება წელს 26, 27 და 28 ივნისს ლისი ვანდერლენდში იყო დაგეგმილი და სცენაზე მსმენელები ისეთი შემსრულებლების ხილვას ელოდნენ, როგორებიც არიან SHE WANTS REVENGE, Aparat და LP.
„კონკრეტულ თვესთან დაკავშირებით ჯერჯერობით ვერ გავაკეთებთ ვერანაირ პროგნოზებს იმიტომ, რომ ძალიან ბევრ ფაქტორზე ვართ დამოკიდებული, მათ შორის ფრენების აღდგენაზე.ტურისტულ მხარეს რომ თავი დავანებოთ, ყველაზე მნიშვნელოვანია, რომ არტისტი ჩამოვიდეს, მიიღოს მონაწილეობა ფესტივალში. იმედი გვაქვს, რომ 25 ივნისამდე დავასახელებთ კონკრეტულ თარიღს.ფესტივალის ბილეთების გაყიდვა დაწყებული იყო, თუმცა, საგანგებო მდგომარეობის შემდეგ შევაჩერეთ და ყველას ვინც ბილეთები შეიძინა საჩუქრები გავუკეთეთ აბონემენტების სახით. რაც შეეხება ზარალს, რა თქმა უნდა, ყველა ბიზნესისთვის მსგავსი სიტუაცია ნეგატიურად აისახება იმიტომ, რომ გათვლილი გვაქვს ბევრი რამ და დანაკარგებიც ბევრია. იმედი გვაქვს გამოვძვრებით.“ - განმარტავს Tbilisi Open Air-ის პიარისა და მარკეტინგის ხელმძღვანელი ხატია გელოვანი.
შავიზღვისპირეთში კი Black sea Arena-ს ღონისძიებების ჩამონათვალში ამჯერად მხოლოდ Nile Rodgers & CHIC (18 ივლისი) და One Republic (10 ოქტომბერი) მუსიკალური ღონისძიებებია მითითებული, რომლებიც ასევე კითხვის ნიშნის ქვეშ დგას. როგორც არენას დირექტორი ტატო ხარჩლავა „კომერსანტთან“ განმარტავს, საკონცერტო სივრცის გახსნის უახლოეს პერიოდად ოქტომბრის თვე მიიჩნევა, თუმცა, დეტალური ინფორმაცია ადმინისტრაციის მხრიდან უახლოეს მომავალში გახდება ცნობილი.
„ახლა სეზონის გადარჩენაზე მიდის მუშაობა,არტისტებმა თავისთავად გააუქმეს ღონისძიებები,რომელიც დაგეგმილი იყო ივნისსა და ივლისში.იმ მუსიკოსების კონცერტები, რომელიც დაგეგმილია ოქტომბერში, შეიძლება მაინც ჩავატაროთ და სეზონი ოდნავ მაინც გააქტიურდეს. ახლა დეტალების გარკვევის პროცესში ვართ და ცოტა ხანში ოფიციალურ განცხადებასაც გავაკეთებთ. ეს ძალიან მძიმე პროცესია. რაც შეეხება ზარალთან დაკავშირებულ თანხებს, ამაზეც გვიჭირს საუბარი. მუსიკოსებმა მომავალი წლისთვის გადადეს ჩამოსვლა. ეს ფესტივალებსითვის ძალიან დამაზარალებელი იქნება, რადგან მათ დაანონსებული ჰყავდათ არტისტები.“ - ამბობს ტატო ხარჩილავა.
ამერიკელი ჯანდაცვის ექსპერტის პროგნოზით, კორონავირუსით გამოწვეული პანდემიის გამო ნაკლებსავარაუდოა, რომ ფესტივალები და კონცერტები მომავალი წლის შემოდგომამდე დაბრუნდეს.
მარიამ მორგოშია