საქართველოს მთავრობამ სოფლის მეურნეობის ანტიკრიზისული გეგმა წარადგინა, რომელიც მცირე, საშუალო და მსხვილი ფერმერული მეურნეობების დახმარებას ისახავს მიზნად. პროგრამის ბიუჯეტი 300 მილიონ ლარამდეა და ის საწვავის, ქიმიკატების, მელიორაციის, ლიზინგის, ხვნის, აგროწარმოებისა და სესხების სუბსიდირება-თანადაფინანსებას ითვალისწინებს. პროექტი, ასევე ითვალისწინებს რამდენიმე უკვე არსებული პროგრამის, იაფი აგროკრედიტის, „დანერგე მომავალის“ და სხვების დაფინანსებების გაფართოებას.

რაც შეეხება კონკრეტულად ლიზინგის მიმართულებით ცვლილებებს, „შეღავათიანი აგროკრედიტის” ძირითადი საშუალებების კომპონენტში იზრდება თანადაფინანსების პროცენტი, არსებული წლიური 9%-ის ნაცვლად სახელმწიფო ფერმერს  12%-ს დაუფინანსებს.

„სალიზინგო კომპანიების ასოციაციის“ თავმჯდომარე და „ალიანს ჯგუფი ლიზინგის“ აღმასრულებელი დირექტორი აიეტ კუკავა „კომერსანტთან“ საუბრისას აღნიშნავს, რომ მიუხედავად სოფლის მეურნეობის განვითარებაში ლიზინგის დიდი მნიშვნელობისა, სახელმწიფოს მიერ ლიზინგთან დაკავშირებული განცხადება - ბუტაფორიულია.

„სოფლის მეურნეობის განვითარებაში ლიზინგს შეუძლია მნიშვნელოვანი როლი შეასრულოს, თავისთავად სოფლის მეურნეობის განვითარება კი აგრო ტურიზმს განავითარებს და ტურიზმის დარგს უფრო მომგებიანს გახდის ქვეყნისათვის. ვინაიდან მოხდება იმპორტის ჩანაცვლება ადგილობრივი სოფლის მეურნეობის ნაწარმით, ამით ნაკლები ვალუტა გავა ქვეყნიდან იმპორტზე და თავისთავად ეროვნულ ვალუტის გამყარებასაც ხელი შეეწყობა. მომავალში კი ექსპორტის ზრდასაც გამოიწვევს. როგორც ლიზინგის ასოციაციის თავმჯდომარე ვიტყვი, რომ ის რასაც ახლა სახელმწიფო ცდილობს ლიზინგთან დაკავშირებით - ბუტაფორიულია. ვინაიდან უჯერებენ ეროვნულ ბანკს, რომელსაც ყველა საფინანსო დარგი, საბანკოს გარდა საშიშად მიაჩნია, რაც ბუნებრივია, რადგან საბანკო დარგის ზედამხედველობის გარდა გამოცდილება და ცოდნა არ გააჩნიათ.

ლიზინგი გაცილებით განვითარებულია საქართველოს ფარგლებს გარეთ, მათ შორის თურქეთში, აზერბაიჯანში, ყაზახეთში და ა.შ. არადა განვითარებად ქვეყნებში სოფლის მეურნეობის სექტორში ლიზინგის როლი ძალიან მნიშვნელოვანია, რადგან მათ სჭირდებათ ახალი დანადგარები და ტექნოლოგიები, იმისთვის რომ საქონელი ექსპორტზე გაიტანო და საერთაშორისო ბაზარზე კონკურენტუნარიანობა შეინარჩუნო. ლიზინგი ერთადერთი დარგია, რომელიც სტარტაპსაც კი აფინანსებს და ითვლება რომ ლიზინგის დარგი თუ იზარდება პირდაპირპროპორციულად იზრდება მშპ-ც. გარდა ამისა, ლიზინგი არ იწვევს ჭარბვალიანობას, ის ერთადერთი მექანიზმია ბაზარზე, რომელიც საშუალებას იძლევა ადამიანს აქტივი მისცე, რომელსაც გირაო არ აქვს. ადამიანს შეუძლია აქტივი იქირაოს, არ ჰქონდეს საკუთარ ბალანსზე და იმ დღიდანვე დაიწყოს შემოსავლის გენერირება“, - განაცხადა აიეტი კუკავამ.

„სალიზინგო კომპანიების ასოციაციის“ თავმჯდომარე საქართველოში ლიზინგის განვითარების ხელისშემშლელ ფაქტორებზეც საუბრობს და აღნიშნავს, რომ ეროვნული ბანკი მხოლოდ საბანკო სექტორს და მის დაქვემდებარებაში არსებულ სექტორებს უწყობს ხელს, სხვა სფეროებს კი არამომგებიანს ხდის.

„ლიზინგის განვითარებას საქართველოში სხვადასხვა პატარა მექანიზმებით იმდენად უშლიან ხელს, განსაკუთრებით ეროვნული ბანკი, რომ თუ არ ხარ საბანკო სექტორის ქვეშ, ამ სფეროს არამომგებიანს ხდიან. ერთადერთი დამოუკიდებელი ლიზინგის კომპანია ვიყავით წლების განმავლობაში, რადგან არცერთი ინვესტორი არ შემოდის ამ სფეროში, არსებული სიტუაციიდან გამომდინარე, დარგი არ არის მათთვის მიმზიდველი, ჩვენი კომპანიაც პასიურ რეჟიმშია, მიუხედავად იმისა რომ დიდი დარტყმები და კრიზისები არ გვქონია. არიან ლიზინგის კომპანიები, რომლებიც ბანკის დაქვემდებარებაშია და მათი საკრედიტო პორტფელის ზრდა საკუთარი ბანკების დახმარებით გარანტირებულია. ჩვენ კი ერთადერთი ლიზინგის კომპანია ვართ რომელიც დამოუკიდებელია და არცერთი ფინანსური ორგანიზაცია ჩვენს უკან არ დგას. მცდარია მოსაზრება, რომ საქართველოში ლიზინგის დარგი ვითარდება, ვინაიდან ეს დარგი საინტერესო რომ იყოს ათეული მოთამაშე გვეყოლებოდა“, - განმარტავს აიეტი კუკავა.

ნინო თამაზაშვილი