2021 წლისთვის მთავრობა და ეროვნული ბანკი 5%-იან ეკონომიკურ ზრდას პროგნოზირებს, საერთაშორისო სავალუტო ფონდის პროგნოზით კი ზრდა უფრო მცირე, 4.3% იქნება.

განსხვავებული პროგნოზი აქვს ISET-ის კვლევით ინსტიტუტს, 2021 წლის პირველ კვარტალში ის ელის, რომ ქვეყნის ეკონომიკა 1.4%-ით შემცირდება, მომდევნო წლის ბოლო კვარტალში კი მშპ-ს 3.3%-ით შემცირებას პროგნოზირებს. რაც შეეხება მიმდინარე წელს, 2020 წლის ბოლოსთვის ის ელის, რომ ქვეყნის ეკონომიკა წლიურად 4.4%-ით შემცირდება.

ISET-ის კვლევითი ინსტიტუტის უფროსი მკვლევარი დავით კეშელავა „კომერსანტთან“ საუბრისას ამბობს, რომ საერთაშორისო ორგანიზაციების და მათი პროგნოზი ერთმანეთისგან დათვლის მეთოდოლოგიით განსხვავდება, სხვა ორგანიზაციები პროგნოზებში ექსპერტულ მოსაზრებებსაც ითვალისწინებენ, რაც მაჩვენებლების ცვლილებას იწვევს. მისი თქმით, ახალი შეზღუდვების გამო მოსალოდნელია, რომ ეკონომიკური ზრდის პროგნოზები ყველა ორგანიზაციამ შეცვალოს და მოვლენები უფრო პესიმისტური სცენარით განვითარდეს.

„მთავარი მიზეზი თუ რატომ არის განსხვავებული ჩვენი პროგნოზი ეროვნული ბანკის და სავალუტო ფონდის პროგნოზისგან, არის მეთოდოლოგიაში, ჩვენი მოდელი მხოლოდ წარსულ მონაცემებს ეყრდნობა და ეკონომეტრიკული ანალიზით ახდენს მომდევნო ორი კვარტლის პროგნოზირებას. სებ-ი და საერთაშოისო ორგანიზაციები იყენებენ ექსპერტულ ანალიზს და ამ რიცხვების კორექტირებას ამის მიხედვით ახდენენ. მოდელის მიხედვით რამდენიმე ფაქტორია რომელიც ამ მაჩვენებელს განაპირობებს, ეს არის წარსული ეკონომიკური აქტივობის მაჩვენებლები.

თუმცა, როგორც ჩვენი ასევე სხვა ორგანიზაციების პროგნოზები ძალიან დიდი სირთულის და გამოცდის წინაშეა ახლა, რადგან იმდენად სწრაფად იცვლება ჩვენს ირგვლივ ყველაფერი, მათ შორის პანდემიასთან და შეზღუდვებთან დაკავშირებით, რომ პრაქტიკულად წარმოუდგენელია  ჩვენს მსგავს მოდელში ასეთი რამ გავითვალისწინოთ და შეიძლება აცდენებიც მოხდეს. რამდენიმე დღის წინ დაწესებულმა შეზღუდვებმა არსებულ პროგნოზზე შესაძლოა მნიშვნელოვანი გავლენა მოახდინოს, ჩვენი პროგნოზი ამ შემთხვევაში შესაძლოა ოპტიმისტური გამოდგეს იმასთან შედარებით ვიდრე რეალობა იქნება. დარჩენილ თვეებში ეს შეზღუდვები ეკონომიკას დამატებით ტვირთად დააწვება, რაც არსებულ საპროგნოზო მაჩვენებელში გათვალისწინებული საერთოდ არ იყო. ეს ყველაფერი კი იმის თქმის საშუალებას გვაძლევს, რომ ეკონომიკა შესაძლოა იმაზე მეტად შემცირდეს, ვიდრე ISET-ის, ეროვნული ბანკის თუ სავალუტო ფონდის პროგნოზებშია წარმოდგენილი, რეალურად მაჩვენებელი უფრო პესიმისტური სცენარისკენ წავა.

ეს ყველაფერი უკვე ეკონომისტების პროგნოზის არეალს სცდება, რადგან ყველაფერი ეპიდსიტუაციაზეა დამოკიდებული და ასევე მსოფლიოში არსებულ ვითარებაზე, რადგან საგარეო სტატისტიკა ჩვენს მსგავს ქვეყნებში მნიშვნელოვან როლს თამაშობს“, - განაცხადა დავით კეშელავამ.

აღსანიშნავია, რომ სებ-ის პროგნოზი ბევრად ოპტიმისტურია, ის 2021 წელს 5%-იან ეკონომიკურ ზრდას პროგნოზირებს. 2020 წელს კი ეროვნული ბანკის შეფასებით, საქართველოს ეკონომიკა 5%-ით შემცირდება.

„საბაზო პროგნოზის მიხედვით, 2020 წელს ეკონომიკური აქტივობა 5%-ით შემცირდება, ხოლო 2021 წელს მდგომარეობის გაუმჯობესება და ეკონომიკური ზრდაა მოსალოდნელი. 2021 წელს ეკონომიკური აქტივობის აღდგენას ძირითადად ადგილობრივი მოთხოვნა და საინვესტიციო აქტივობა განაპირობებს. საგარეო მოთხოვნა კი, კვლავ სუსტი დარჩება და მხოლოდ ნაწილობრივ აღდგება. ტურისტული ნაკადების აღდგენა მხოლოდ 2021 წლის მეორე ნახევრიდან არის მოსალოდნელი. ეკონომიკური აქტივობის გაუმჯობესებას თან ახლავს უმუშევრობის შემცირება, თუმცა საშუალვადიან პერიოდში მოსალოდნელია ეკონომიკის პოტენციური ზრდის შენელება, რასაც ღრმა რეცესიით გამოწვეული საწარმოო სიმძლავრეების გაუარესება და სამუშაო ადგილებზე უსაფრთხოებასთან დაკავშირებული ხარჯების ზრდა განაპირობებს. გარდა ამისა, პოტენციურ ზრდას ასევე შეანელებს ეკონომიკის სტრუქტურული ცვლილებები, რაც სამუშაო ძალისა და სხვა საწარმოო რესურსების პანდემიის მიმართ მოწყვლადი სექტორებიდან გადაადგილებასთანაა დაკავშირებული“, - აცხადებენ ეროვნულ ბანკში.

შეგახსენებთ, რომ 2020 წლის 9 თვის მდგომარეობით, საქართველოში 5%-იანი რეცესია ფიქსირდება.