საქართველოში ეპიდემიოლოგიური მდგომარეობა დღითიდღე უარესდება. დაავადებათა კონტროლის ეროვნული ცენტრი მკაცრი შეზღუდვების აღდგენაზე უკვე ალაპარაკდა, თუმცა პრემიერ–მინისტრი ირაკლი ღარიბაშვილი ამბობს, რომ ქვეყნის ეკონომიკა დაკეტვას ვეღარ გაუძლებს. შესაძლო შეზღუდვებზე „კომერსანტთან“ Aspria-ს დირექტორის ოთარ თავყელიშვილი საუბრობს. იგი იზიარებს ირაკლი ღარიბაშვილი აზრს და ამბობს, რომ მესამე „ლოქდაუნი“ ბიზნესისთვის დამანგრეველი იქნება.
„ახალი შეზღუდვები ფიტნეს ინდუსტრიას დაანგრევს. ჩვენ ვიხდით იჯარებს, ლიზინგებს, სესხებს. ყველგან დაქირავებული გვაქვს მაღალჭერიანი, დიდი კვადრატულობის მქონე ფართი, რომელიც პირველ სართულზეა განთავსებული, ასეთი უძრავი ქონების ფასი კი ძალიან მაღალია. შესაბმისად ახალ შეზღუდვებს ვერ მოვერევით, ჩვენი ბიზნესი ძალიან რთულ მდგომარეობაში აღმოჩნდება. მომხმარებელთა როდენობა საგრძნობლადაა შემცირებული, პანდემიამდელ პერიოდთან შედარებით 3 ჯერ ნაკლებია“, - აცხადებს ოთარ თავყელიშვილი.
ქვეყანაში შექმნილი რთული ეკონომიკური და ეპიდემიოლოგიური მდგომარეობის მიუხედავად, ბიზნესმენს იმედი აქვს, რომ შეზღუდვები არ დაწესდება და სიტუაცია ქვეყანაში უკეთესობისკენ შეიცვლება. სწორედ ამიტომ, როგორც ოთარ თავყელიშვილი ამბობს, Aspria განვითარებას განაგრძობს.
„ოპტიმისტები ვართ, ვიცით, რომ მალე ეს ყველაფერი დამთავრდება. მჯერა, რომ ხალხი ვარჯიშს შეუდგება და ჯანსაღი ცხოვრების წესი მათ ყოველდღიურობა გახდება. სწორედ ამიტომ გეგმები არ შეგვიცვლია, დასახულ მიზანს მივყვებით. ინვესტიციები გაგრძელდება, თუმცა ამას უკუკავშირი უნდა მოჰყვეს. ჩვენ რომ ბიზნესში ფინანსური რესურსი ჩავდოთ და შემდეგ მუშაობის შესაძლებლობა არ მოგვეცეს, ეს კომპანიას კრახს მოუტანს, არამარტო ჩვენ, არამედ სრულიად სექტორს. ამ საშიშროებას ვხედავთ, მაგრამ იმედია მდგომარეობა გამოსწორდება, მოხდება ვაქცინაცია, შეზღუდვები არ იქნება დაწესებული და ჩვენი ბიზნესი ჩვეულებრივ რეჟიმში ამუშავდება“, - განაცხადა ოთარ თავყელიშვილმა.
ბიზნესმენი გვიყვება, რომ კომპანიამ აბონემენტის ღირებულება უმნიშვნელოდ, 10-15 დოლარით გააძვირა. მიზეზი, მისი თქმით, გაზრდილი კომუნალური ტარიფები და გაუფასურებული ეროვნული ვალუტაა. როგორც თავყელიშვილი ამბობს, რთული ეკონომიკური მდგომარეობის გამო Aspria ვერ ითვალისწინებს იმ გარემოებას, რომ მოსახლეობის გადახდისუნარიანობა არ მომატებულა. Aspria-ს დირექტორი საკოორდინაციო საბჭოს მიერ გაცემული რეკომენდაციების დაცვაზე ამახვილებს ყურადღებას და ამბობს, რომ ყველაფრის მიუხედავად სიფრთხილე აუცილებელია.
„საბურთალოს ახალ ფილიალში საკმოდ ძვირადღირებული დანადგარი დავაყენეთ, რომელიც მემბრანების დახმარებით ჰაერს ფილტრავს და დარბაზში ვირუსებს არ ატრიალებს, ადამიანი ადამიანთან პირად კონტაქტში თუ არ შევიდა, დაინფიცირების შანსი არის მინიმალური. ამ დანადგარის ანალოგი, რომელიც ახლა ჩვენ გვიყენია, არც ერთ კომპანიას არ აქვს. ასეთი ტიპის სავენტილაციო სისტემის დაყენებას ვაპირებთ გლდანსა და ვაკეში, უბრალოდ ამას გარკვეული დრო სჭირდება“, - ამბობს ოთარ თავყელიშვილი.
Aspria ფიტნესის ბაზარზე 5 ფილიალითაა წარმოდგენილი. მათ შორის 4 თბილისში, ხოლო 1 ფილიალი ბათუმში მდებარეობს.
ბაჩო ადამია