მთავრობას საგანგებო მდგომარეობის გამოცხადების გარეშე, შემზღუდავი ღონისძიების გამოყენების უფლება 2020 წლის ბოლომდე გაუხანგრძლივდა. პარლამენტმა „საზოგადოებრივი ჯანმრთელობის შესახებ“ კანონში შესატანი ცვლილებების პროექტი 79 ხმით დაამტკიცა. აღნიშნული ცვლილებებით, მთავრობას საკარანტინო ღონისძიებების გატარების უფლება, რაც დაკავშირებულია გადაადგილების, ეკონომიკური საქმიანობის, საკუთრების, თავშეყრის, შრომის და სხვა უფლებების შეზღუდვასთან, 15 ივლისის ნაცვლად, 2021 წლის 1 იანვრამდე შეეძლება.

„კავკასიის უნივერსიტეტის“ ეკონომიკის სკოლის დეკანი სოსო ბერიკაშვილი „კომერსანტთან“ საუბრისას განმარტავს, რომ ახალი კანონპროექტს არა მხოლოდ პოლიტიკური, არამედ ეკონომიკური ეფექტიც ექნება, რადგან მთავრობას მარტივად და ნებისმიერ დროს საშუალება ექნება, ბიზნესი შეზღუდოს.

„კანონი უფრო მეტად პოლიტიკურია , ვიდრე ეკონომიკური, თუმცა ცხადია ეკონომიკური ეფექტი ექნება. თუ მთავრობას მარტივად ანუ პარლამენტის თანხმობის გარეშე ექნება საშუალება, რომ ნებისმიერი ბიზნესი შეზღუდოს, რა თქმა უნდა ეს ბიზნესისთვის დამაზიანებელი იქნება, რადგან დამოკიდებული ვიქნებით ხელისუფლების ერთი შტოს კეთილგონიერებასა და კეთილსინდისიერებაზე. ისედაც ამ მძიმე პერიოდში, მსგავსი კანონი ბიზნესგარემოს კიდევ უფრო მეტად დააზარალებს. ინვესტიციების კუთხით რომ შევაფასოთ, ინვესტორისთვის მნიშვნელოვანია სტაბილურობა და სანდოობა, ამ კანონის ფარგლებში კი მთავრობას საშუალება ექნება ნებისმიერი სახის ბიზნესსაქმიანობა შეზღუდოს და ეს ინვესტორისთვის რა თქმა უნდა შესაძლოა შემაფერხებელი აღმოჩნდეს“, - აღნიშნავს სოსო ბერიკაშვილი.

ეკონომიკის ექსპერტის ზვიად ხორგუაშვილის აზრით, ახალი კანონპროექტი დღეს არსებულ ძალიან მძიმე ეკონომიკურ მდგომარეობას კიდევ უფრო მეტად გააუარესებს.

„რაც უფრო მეტი აღმასრულებელი ძალაუფლება აქვს ხელისუფლებას, მით უფრო მეტად არის მოლოდინი, რომ ის ამას შეზღუდვებისთვის, მათ შორის ბიზნესის საწინააღმდეგოდ გამოიყენებს. როდესაც ცნობილია, რომ მთავრობას აქვს იმის უფლება, რომ ბიზნესს ნებისმიერ დროს სხვადასხვა მიზეზების გამო საქმიანობა შეწყვიტოს, რა თქმა უნდა ეს რისკებს ზრდის. აქედან გამომდინარე, რისკი ბიზნესისთვის დანახარჯს ნიშნავს, შესაბამისად თუ რისკი იზრდება დანახარჯიც იმატებს. ამ ძალაუფლებას მთავრობა გამოიყენებს თუ არა რისკები და შესაბამისად ბიზნესს დანახარჯი ეზრდება. თუ ხელისუფლება შემზღუდავ ღონისძიებებს გამოიყენებს, მაშინ დღეს უკვე არსებული კატასტროფული ეკონომიკური მდგომარეობა, არა თუ შენელდება, არამედ უკან-უკან წავა. არსებული სიტუაცია არამხოლოდ ქართულ ბიზნესებს დააზიანებს, არამედ ინვესტიციებსაც შეუშლის ხელს“, - განაცხადა ზვიად ხორგუაშვილმა.

აღსანიშნავია, რომ საკარანტინო ღონისძიებებში, მოიაზრება ღონისძიებები, რომლებიც დროებით გამოიყენება პანდემიის ან/და საზოგადოებრივი ჯანმრთელობისთვის განსაკუთრებით საშიში ეპიდემიის დროს მოსახლეობის ჯანმრთელობის დაცვის მიზნით და შეიძლება გულისხმობდეს შესაბამისი შეზღუდვების დროებით დაწესებას, საჯარო დაწესებულებების, აღმასრულებელ ხელისუფლებაში შემავალი სხვა დაწესებულებების, საჯარო სამართლის იურიდიული პირების, სხვა იურიდიული პირების საქმიანობასთან/ადმინისტრირებასთან, საჯარო სერვისების მიწოდებასთან, პირთა მიმოსვლასთან, საკუთრებასთან, შრომასთან, პროფესიულ ან ეკონომიკურ საქმიანობასთან, უკანონო მიგრაციასთან/საერთაშორისო დაცვასთან ან/და სოციალური ღონისძიებების ჩატარების მიზნით პირთა თავშეყრასთან დაკავშირებით. მთავრობას ზემოაღნიშნული ღონისძიებების გატარება ქვეყანაში საგანგებო მდგომარეობის გამოცხადების გარეშეც შეუძლია. შესაბამისად, მათ ასამოქმედებლად მთავრობას არ სჭირდება პარლამენტის მხარდაჭერა.

ნინო თამაზაშვილი