ივლისის მესამე კვირა თითქმის იმეორებს გასული კვირის ტენდენციებს, აღნიშნულია თიბისი კაპიტალის მიერ გამოქვეყნებულ „აღდგენის დინამიკაში“. თიბისი კაპიტალის მონაცემებით, მცირე ცვლილებები დაფიქსირდა, როგორც ახალი გაცემული იპოთეკური სესხების, ასევე თბილისის საცხოვრებელი უძრავი ქონების ტრანზაქციების მხრივ.
„2022 წლის 1-21 ივლისის პერიოდში, ახალი გაცემული იპოთეკური სესხების მოცულობის ზრდა მცირედით გაუმჯობესდა და +12%-ს გაუტოლდა 2021 წელთან შედარებით. 1-21 ივლისის პერიოდში, თბილისის საცხოვრებელი უძრავი ქონების ტრანზაქციების რაოდენობის ზრდა მცირედით შენელდა და +27% შეადგინა წ/წ.
15-21 ივლისის პერიოდში არარეზიდენტების უნაღდო ხარჯვა, თიბისი ბანკის არხებით, 59%-ით აღემატება 2019 წლის დონეს.
1-21 ივლისის პერიოდში, სურსათსა და ფარმაციაზე რეზიდენტების უნაღდო დანახარჯების ზრდამ მცირედით დაიკლო 31%-ს გაუტოლდა 2021 წელთან შედარებით. სხვა კატეგორიებზე რეზიდენტების უნაღდო ხარჯვის ზრდა სტაბილურია და +0.53% შეადგინა წ/წ.“, - აღნიშნულია თიბისის კაპიტალის მიერ გამოქვეყნებულ ინფორმაციაში.
ირკვევა, რომ ტურიზმისთვის ამ კვირამაც სახარბიელოდ ჩაიარა. სასტუმროებში რეზიდენტებისა და არარეზიდენტების მიერ ჯამურად გაწეული უნაღდო დანახარჯები, თიბისი ბანკის არხებით, სტაბილურად გაიზარდა, ხოლო სასტუმროებში არარეზიდენტების უნაღდო ხარჯვამ კვლავ გადააჭარბა პანდემიამდელ მაჩვენებლებს.
თიბისი ბანკის არხებით, სასტუმროებში უნაღდო ხარჯვა სტაბილურია და 87%-ს უტოლდება 2019 წლის მაჩვენებელთან შედარებით (+36% წ/წ). რესტორნებსა და კაფეებში უნაღდო დანახარჯების ზრდა შემცირდა და 154% შეადგინა 2019 წელთან შედარებით (+44% წ/წ).
უნაღდო დანახარჯები, თიბისი ბანკის არხებით, გაიზარდა სხვა სეგმენტებისთვის, როგორიც არის ავეჯი და მოწყობილობები და სამშენებლო მასალები.
2019 წელთან შედარებით, ტანსაცმელსა და აქსესუარებზე უნაღდო დანახარჯების ზრდაზე კლება დაფიქსირდა და 156%-ს გაუტოლდა. გართობაზე უნაღდო დანახარჯების ზრდა შემცირდა და 59%-ს გაუტოლდა 2019 წლის ნიშნულთან შედარებით. ფიტნესზე უნაღდო დანახარჯები გაუმჯობესდა და 238% შეადგინა 2019 წელთან შედარებით.
სამშენებლო მასალებზე უნაღდო დანახარჯების ზრდა გაუმჯობესდა და 44%-ით აჭარბებს 2021 წლის მაჩვენებელს. ავეჯსა და მოწყობილობებზე უნაღდო ხარჯვის ზრდამ მცირედით მოიმატა და 32% შეადგინა წ/წ. ელექტრონიკაზე უნაღდო ხარჯვის ზრდა სტაბილურია და 21% შეადგინა 2021 წელთან შედარებით.
პირად ჰიგიენაზე უნაღდო დანახარჯების ზრდა მცირედით შენელდა და 29% შეადგინა 2021 წლის მაჩვენებელთან შედარებით. მანქანის შეკეთებაზე უნაღდო ხარჯვა სტაბილურია და 41%-ს შეადგენს წ/წ. საწვავსა და ტრანსპორტზე უნაღდო დანახარჯების ზრდა თითქმის უცვლელია და 24%-ით აღემატება 2021 წლის დონეს.